Зоран Заев ги посети денес Арачиново и Орланци каде што разговараше со жителите. СДСМ во сооштение пренесува дел од средбата:
“Вие сте првиот македонски политичар кој дошол овде кај нас. Ние вас многу ве почитуваме. Затоа што сте чесен, добронамерен и реален човек, рече еден од присутните.
Вака го пречекаа претседателот на СДСМ Зоран Заев во Арачиново и Орланци.
Ми правите огромна чест што ме пречекавте во толку голем број. Ви се заблагодарувам за гостопримството. Овде сум за првпат но не и последен. Ќе се гледаме почесто, вети Заев во Арачиново.
Нека дојдат Груевски и Иванов овде како што вие дојдовте. Тие нас не имаат заборавено. Претседателот на државата не сме го чуле да каже нешто добро за нас албанците, рече еден од жителите.
Затоа, ние велиме Македонија заслужува вистински претседател. Претседател на сите граѓани на оваа земја. Претседател кој ќе биде во функција на граѓаните а не на власта. Ние можеме и ние мораме да избереме таков претседател, истакна Заев.
Ние се определивме да му го дадеме нашиот глас на Стево Пендаровски, затоа што веруваме дека и тој како тебе е искрен и чесен човек, одговорија тие.
Ние имаме еден живот и сакаме среќно да го проживееме. Затоа, нам ни се потребни промени. Тие промени се можни само ако ние, граѓаните на оваа држава се договориме тоа заеднички да го направиме. Со сојузништво ние ќе станеме граѓани на една модерна, просперитетна и демократска земја.
Во оваа земја соживот има но живот нема. Нас не тиштат економски проблеми од кои зависат сите македонски семејства, нагласи претседателот Заев пред жителите на Арачиново и Орланци”, вели СДСМ.