Во Македонија бројот на тестирања за ХИВ е многу низок , само еден процент на годишно ниво, затоа и новите случаи тешко се откриваат, велат во Здружението за подршка на пациенти за ХИВ/СИДА.
Од таму велат дека бројката од 11 ново заболени со ХИВ/СИДА за последните три месеци, која ја објави Институтот за јавно здравје е предимензионирана бидејќи станува збор за проект со кој се тестирани ризичните групи, корисници на дрога, сексуални работници, хомосексуалци, затвореници и млади.
Бидејќи станува збор за ризични групи очекувано е да се откријат нови случаи. Малиот процент на луѓе кои доаѓаат да се тестираат вообичаено се должи на ниската свест за последиците доколку се стапува во сексуален однос без заштита, вели за НОВА, Андреј Сених, извршен директор на Здружението.
Со овој проект само во делот на корисниците на дрога биле тестирани околу 400 луѓе, но кај нив не е откриен ниту еден заболен од ХИВ/СИДА. Осум од ново откриените заболени се мажи кои имале секс со мажи, а тројца сидата ја добиле преку сексуален однос со жена.
Проектот со кој е направено ова истражување бил подржан од Глобалниот фонд, заедно со Институтот за јавно здравје и Министерството за здравство, но резултатите не се официјално објавени.
Од невладината организација ХЕРА велат дека бројката е далеку од алармантна бидејќи се работи за целна група која под голем ризик за ХИВ, поради што Македонија не влегува во земји со концентрирана епидемија кај одредени групи, и останува земја со ниска стапка на ХИВ.
-Потенцираме дека не постојат ризични групи туку ризично однесување за ХИВ и дека целта на сите превентивни програми за ХИВ е да се зголемува бројот на лицата кои се свесни за својот ХИВ статус во рана фаза од ХИВ инфекцијата потенцираат во ХЕРА.
Од таму велат дека токму затоа од воспоставувањето на превентивни сервиси за групите од особен ризик преку програмата на Министерството за здравство и Глобалниот фонд во 2004 до денес бројот на лица кои се свесни за ХИВ статусот е трикратно зголемен.