Портпаролката на руското Министерство за надворешни работи, Марија Захарова, денеска изјави дека за Москва е неприфатлив привремен прекин на огнот во Украина.
Привремен прекин на огнот или, како што многумина велат, замрзнување на конфликтот е неприфатливо, рече Захарова, пренесена од руските медиуми.
Според неа, такво нешто Западот, колективно или индивидуално, би го искористил за зајакнување на воениот потенцијал на режимот во Киев и за обид за вооружена воена одмазда.
Потребни ни се сигурни, правно обврзувачки договори и механизми кои ќе гарантираат дека кризата нема да се повтори, изјави Захарова.
Таа рече дека основата за таквите договори може да биде тоа што беше договорено во пролетта 2022 година за време на неколку рунди руско-украински преговори во Белорусија и Турција.
Захарова истакна дека за време на преговорите што се воделе во 2022 година било планирано гаранти на договорот да бидат постојаните членки на Советот за безбедност на ОН, како и Германија, Израел, Италија, Канада, Полска и Турција, додавајќи дека оваа листа постојано се менува.
Како во иднина ќе се создаваат можни договори и кои ќе бидат нивните гаранти ќе покажат резултатите од новите преговори и новиот преговарачки процес, кога ќе започнат и кога ќе се одржат, рече Захарова.
Договорот од 2022 година, што не беше усвоен, предвидува, меѓу другото, Украина да прифати геополитичка неутралност, да не влегува во НАТО, да ја ограничи големината на нејзините вооружени сили и да и даде на источна Украина специјален статус.