Собраниската Законодавно-правна комисија на денешната седница ќе расправа по двата медиумски закони, предлог-законите за медиуми и за аудио и аудиовизуелни медиумски услуги, во второ читање.
Вчера имаше жестока комисиска дебата за законите за медиуми. Власта брзајќи да ги изгласа законите го прекрши и Деловникот, истиот оној кој го изгласаа пратениците кои по случувањата на 24 декември останаа во собраниската сала без опозицијата.
Новиот тогаш изгласан Деловник предвидува рок од три дена во кој ќе бидат разгледани сите амандмани, во случајот со законите за медиуми 94 на број.
Опозицијата праша што ќе се случи ако амандманите не бидат исцрпени во предвидениот рок.
„Власта мрази закони, правила, Устав, тоа не им одговара на нивните тендерски активности. Вие имате проблем со слободата на изразување во Македонија, без разлика дали е новинар, пратеник или граѓанин, власта има проблем кога некој граѓанин зборува“, рече Јани Макрадули.
Тој рече дека работата на Собранието се регулира по непишани правила и даде гаранција дека пратеничката група на опозицијата нема да ги блокира законите за медиуми ако Деловникот се прецизира.
„Одете кај Трајко, познат по семејните афери, и договорете како да не го прекршувате деловникот“, побара Макрадули.
Здружението на новинари на Македонија до Собранието доставило амандман кој се однесува на предлог-законот за медиуми со кој Здружението и предлага на Владата законот да стапи во сила по влезот на Македонија во Европската унија.
Амандманот содржи еден, член во кој стои: овој закон ќе се применува по приемот на Република Македонија во Европската унија.
Претседателот на ЗНМ, Насер Селмани денеска порача дека пратениците имаат идеална шанса пред македонската јавност да ги решат сите дилеми дека носењето на законот нема за цел да ја ограничи слободата на изразувањето и слободата на медиумите.
„Владата тврди дека овој закон е според европските стандарди. Ако е така тогаш ние немаме ништо против законот да се примени кога ќе станеме членка на ЕУ. Ако било која власт низ пристапните преговори ја убеди Европската Комисија дека во земјата се почитува слободата на изразувањето и слободата на медиумите, тогаш нема да стравуваме дека примената на овој закон ќе може да се злоупотреби за замолчување на критичните гласови во медиумите“, рече Селмани.