Амбасадорот на САД во НАТО Иво Далдер вели дека во Алијансата се уште нема согласност за прием на Република Македонија, но дека се работи на тоа 28-те земји-членки да се договорат за да се постигне успех по ова прашање.
Далдер изјави дека се уште останува одлуката донесена на Самитот во Букурешт во 2008 година, повторена на ланскиот Самит на Алијансата во Чикаго, дека поканата за членство до Македонија ќе биде активирана откако ќе биде решено прашањето за името со заемно прифатливо решение, пренесува МИА.
„Ние во НАТО работиме според еден голем принцип, а тоа е принципот на консензус и ако го немаме за некое прашање тогаш нема напред во однос на истото, потенцира Далдер во врска со приемот на Македонија во најголемата воено-политичка организација на светот. Кога станува збор за прашањето за проширување на Алијансата потребно е членките на НАТО да се согласат. Но, ако нема согласност, тогаш проширувањето нема да се случи. Не станува збор дека 27 земји-членки на НАТО се обидуваат да убедат една друга членка да го промени погледот на некое прашање. Се работи за 28 членки што треба да се договорат за да има напредок по ова прашање “, рече Далдер.