Започна бушењето на тунелот на експресниот пат Градско – Прилеп, а изградбата се очекува да биде завршена за една година. Тунелот е составен од две цевки, во правец кон Прилеп со должина од 139 метри и кон Градско со должина од 159 метри.
Увид на градежните работи за бушење на тунелот кон Прилеп, на делницата Дреново – Фаришка клисура денеска извршија министерот за транспорт и врски, Благој Бочварски, директорот на ЈП за државни патишта, Ејуп Рустеми и заменик директорот на ЈП за државни патишта, Благојче Трпевски.
– Сакам да ги информирам сите граѓани од овој регион дека експресниот пат од Градско до Прилеп и на двете делници се гради со полна пареа. Нема повеќе калкулации. Денеска со директорот на ЈП за државни патишта се наоѓаме на увид на бушење на тунелот кон Прилеп, еден од најкаректеристичните објекти на оваа траса. Овде ќе се изградат две тунелски ленти, едната кон Прилеп со должина од 139 метри и другата кон Градско со должина од 159 метри. Изведувачот е комплетно мобилизиран и на располагање ги има сите потребни ресурси од кадар, работна сила, механизација со опрема и материјали за изведба на тунелите согласно динамиката на изградба, изјави министерот Бочварски.
Тој истакна дека Министерството за транспорт и врски заклучно со октомври има одлична реализација на капиталните инвестиции, што, како што рече, дава оптимизам дека до крајот на годината ќе има висок процент на реализација на капиталните проекти.
Директорот на ЈП за државни патишта, Ејуп Рустеми, исто така потенцираше дека интензивно се работи на експресниот пат Градско – Дреново, кој е поделен во три делници.
– Ширина на делницата Дреново-Фариш е променлива. Пет километри се со асфалтна платформа од 12,4 метри што одговараа на експресен пат, а преостанатите повеќе од пет километри се со платформа од 17 метри што одговара на автопат со намалена ширина. На само десет километри растојание во овој појас се градат два тунела, 21 мост, 5 подвозници, 11 потпорни ѕидови, еден кружен тек на локалниот пат со клучка кај Дреново и еден вијадукт, што говори за каков тешко пристапен терен станува збор, изјави Рустеми.
Како што потенцираат од Министерството за транспорт и врски, овој е еден од најзначајните патни правци во државата, каде дневно поминуваат и над 6 илјади возила од сите категории. Со неговата реализација значително треба да се подобри патната инфраструктура на кракот Д на Паневропскиот транспортен коридор 10.