Министерот за здравство Венко Филипче соопшти дека по состанокот што утрово го имале со работната група за имунизација бил донесен заеднички став по однос на имунизацијата со вакцините на компанијата Астра Зенека дека истите ќе се користат само за вакцинирање на лица над 60 годишна возраст.
До ваква одлука дошле откако го разгледале вчерашното мислене по однос на ова прашање на Европската агенција за лекови од каде посочија дека има индикации според кои во многу ретки случаи со употреба на оваа вакцина кај пациентот да се појави несакан ефект, згрутчување на крвта.
„Утрово го разгледувавме ставот на бордот на ЕМА во врска со „Астра Зенека“. После евалуацијата на сите тие несакани ефекти во форма на тромботични состојби посебно кај млади луѓе, бордот на ЕМА излезе со две препораки: првата е дека тие несакани ефекти треба да влезат во упатството и второ дека секоја држава треба да заземе став како ќе се користи вакцината. Согласно тоа, по утринските консултации, донесовме став вакцината на ’Астра Зенека‘ да не се дава на помлади лица од 60 години во нашата земја“, изјави Филипче.
За граѓаните кои веќе се вакцинираа во Србија засега нема препораки освен да се јават на лекар ако имаат некаков симптом. Дали тие ќе се ревакцинираат со „Астра Зенека“ или со друга вакцина, здравствените власти дополнително ќе одлучуваат.
До сега освен 28-годишната девојка, кај која се јави тромбоза на вената на едното око, министерот вели дека друга ваква појава на несакан ефект не е пријавена, а досега се вакцинирани над 15 000 граѓани.