Министерството за здравство ќе одлучува кој се може да работи во Клиничкиот блок. Нови реформи во здравството најави министерот за здравство Никола Тодоров. На последната седница на Влада, Тодоров најави дека на клиниките ќе се вработуваат само најдобрите, а ќе се знае и кој може да остане да работи таму. Лекарите специјалисти ќе треба да бидат универзални сезнајковци, секој од нив треба да ги знае сите методи кои се вршат на клиниката каде е вработен, без разлика во кој оддел работи.
-На Универзитетските клиники кои се највисока установа од ваков тип, ќе работат само најдобрите од цела држава. Ова значи и дека доколку некој лекар од Битола на пример, напредувал и бил на усовршување во странство во траење од една година, може да премине да работи на скопските клиники и да има раководна функција во својата област, најави на владината седница Тодоров.
Ова ќе биде регулирано со Закон, а предлогот на министерот Тодоров и неговиот тим, ќе биде ставен на јавна расправа до крајот на следната недела.
Остана нејасно дали новите 400 вработувања во здравството ќе бидат регулирани на ваков начин. Во тек се конкурсите за нови вработувања, за кои на клиниките веќе се шпекулира дека се однапред испланирани за партиски кадри. Шпекулациите одат до таму што некои од професорите на Медицински факултет се сомневаат дека тестовите се однапред пробиени и дека кандидатите веќе ги знаат прашањата.
НОВА побара став од професорот на Медицински факултет и абдоменален хирург Милчо Пановски, за новите реформи во здравството, но и за вработувањата кои се во тек
.
-Се што е кажано од министерот Тодоров не коментирам, бидејќи неговите изјави ги сметам за несериозни, одговори кратко Пановски.
.jpg)
Тој смета дека ова што се случува е негативна селекција и дека и доколку бидат вработени солидни кадри, способни и со висок просек, ќе паднат во очи и ќе бидат компромитирани заедно со другите кои ќе бидат примени со партиска книшка.
НОВА од извори во психијатриската болница во Бардовци дознава дека минатиот месец таму бил распишан оглас за вработување на двајца доктори и четири медицински сестри, но кон крајот на минатата недела наводно стигнало известување од Министерството за здравство до раководството, во кое е наведено кои кандидати треба да се вработат.
Неофицијално, нашите извори тврдат дека станува збор за имиња кои однапред фигурираат во болничките кругови, иако тестовите за познавање на странски јазик и медицина сеуште не се готови. На огласот се јавиле 16 кандидати, а наводно договорот меѓу коалиционите партнери е еден од кандидатите да биде од албанска националност, а другиот Македонец.
Директорот Идриз Неџипи демантира дека ги знае однапред имињата на кандидатите кои треба да бидат примени, но потенцира дека изборот го прави Министерството преку тестирање на кандидатите.
-Сеуште не сме го добиле извештајот од Министерството за здравство, но за кого ќе ни речат од таму тој кандидат ќе биде примен, ние не одлучуваме, изјави за НОВА Неџипи.
.jpg)
По ова, НОВА контактираше уште неколку директори на болници и дел од нив потврдија дека во однос на новите вработувања тие се само марионети и ги извршуваат одлуките на Министерството за здравство.
Претседателот на Синдикатот на клиниките Дејан Ставриќ, вели дека финалето ќе покаже дали кандидатите се избираат по партиска линија или по стручност и знаење.
-Не знам што точно значат реформите на Министерот што ги најавува, но пациентите ќе кажат во иднина дали се задоволни од новите кадри, изјави за НОВА Ставриќ.
Методија Трајаноски, човекот кој ги тужи Министерството за здравство и Агенцијата за администрација поради неправилности во изборот на кандидат за државен службеник, низ неговиот сопствен пример покажува дека работите не се такви како што се прикажуваат.
Тој седум години работи како помлад соработник во Министерството за здравство, иако докторирал јавно здравство. Вели дека наместо да биде примен на местото кое одговара за неговата стручност, во Министерството е примен шефот на кабинет на министерот Тодоров кој е со несоодветно образование, има завршено историја на уметност. Еве што вели за вработувањата во здравството.
-На конкурсите се примаат општи доктори, наместо лекари кои приватно си ја платиле специјализацијата. Се примаат лекари во кои допрва треба да се вложува за да специјализираат. Со мали исклучоци, сите вработувања во здравството се партиски, пријателски или по семејна линија, изјави Трајаноски за НОВА.
Останува дилемата дали новите реформи на Тодоров, со кои ќе се подгрее надежта на медицинските кадри со високи квалитети дека конечно ќе се вработат таму каде што заслужуваат, ќе се вклопат во целокупниот политички амбиент во државата и политикатата која ја крои Министерството за здравство.