Украинскиот претседател Володимир Зеленски се огласи преку објава на социјалната мрежа „Икс“ по фијаското на неговата средба со американскиот колега Доналд Трамп и потпретседателот Џеј Ди Венс во Белата куќа.
Зеленски револтирано си замина од денешните состаноци, кои поминаа во тензична атмосфера полна со обвинувања и надвикувања. Според извори од Белата куќа, Трамп наредил да им се каже на Зеленски и членовите на украинската делегација да си одат.
По ова, украинскиот претседател во објавата на „Икс“ напиша: „Ти благодарам Америка, ти благодарам за поддршката, ти благодарам за оваа посета“.
Трамп и Џеј Ди Венс претходно во Овалната соба, пред новинарите и камерите, го обвинија Зеленски за „неблагодарност“ кон Америка. Во серијата остри размени на обвинувања, Трамп му кажа на украинскиот претседател дека „се коцка со Трета светска војна“. Подоцна, во објава на својата социјална мрежа, американскиот претседател напиша дека Зеленски „покажал непочитување кон САД“.
Заедничката прес-конференција на двајцата лидери е откажана, а договорот за американско користење на украинските минерални ресурси во замена за поддршката за Украина, кој беше причината за посетата на Зеленски, остана непотпишан.