Во вториот круг за избор на претседател на Чиле, се најдоа Мишел Башеле и Евелин Матеи. Следната претседателка на Чиле ќе им се придружи на жените-лидери во Јужна Америка, Дилма Русеф на Бразил и Кристина Фернандес на Аргентина.
Бидејќи никој не освои повеќе од 50 отсто од гласовите, на вториот круг од изборите закажани за 15 декември ќе се „натпреваруваат“ двете дами.
Помеѓу деветте кандидати за лидери на Чиле, шест се припадници на машкиот пол а ниеден од нив нема да седне на претседателксата фотелја. Главниот фаворит е Мишел Башеле, која беше претседателка на Чиле од 2006 до 2010 година. Таа воедно беше и Министерка за здравство и Министерка за одбрана.
„Се што сакаме е модерен, единствен и искрен Чиле. Мнозинството за тоа и гласаше“, вели Башеле.
За разлика од Башеле, која освои 47 отсто гласови во првиот круг, нејзината главна-противкандидатка Евелин Матеи освои 25 отсто. Таа своевремено беше Министерка за труд.
„Ќе победиме во вториот круг и ќе продолжиме да ја градиме оваа преубава земја“, изјави Матеи.
Идната претседателка на Чиле, нема да биде единствената дама на чело на јужноамериканска држава. Дилма Русеф, која според пресметките на „Форбс“ е втората највлијателна жена на светот – управува со Бразил, а Кристина Фернандес е на чело на Аргентина од 2007 година, а моментално го отслужува својот втор мандат.