Жерар Депардје, кој во декември 2012 година го предаде својот француски пасош, а во јануари годинава доби руско државјанство со директна наредба на Владимир Путин, ја одигра улогата на Григориј Распутин, во истоимениот филм („Распутин“).
„Во еден момент почувствував блискост со тој лик. И двете мои баби беа пророчици и хипнотизерки. Сум видел многу такви ликови во својот живот во различни држави, во различни пригоди, во различни дворци. А, истовремено овој лик е мошне руски, полн со идеали, монолитен. Живеел во една неспокојна епоха“, вели Депардје во интервју за Руска реч .
На прашањето дали е тешко да се одигра Русин, Депардје вели во уметноста не постојат националности. „Кога Владимир Висоцки настапуваше во Франција, публиката не гледаше Русин, гледачите уживаа во претставите и во песните“.
Депардје е познат по своите чести патувања во Русија. Тој за „Руска реч“ потенцира дека доаѓал веќе 25 години во државата, но дека сега почувствувал дека е време да се задржи подолго. А тоа што добил државјанство му било голема чест.
Французите во декември 2011 година имаа можност да го видат Депардје во режисерската верзија на Жозе Дајан.
Филмот беше сниман за 26 дена. Првото прикажување на „Распутин“ во Париз беше организирано за потомците на руската емиграција. На Божиќ беше прикажан на телевизија. Депардје тврди дека Владимир Путин имал можност да ја види француската верзија.
„Имав неколку средби со тогашниот премиер Путин. Му го дадов сценариото и му реков: „Мора да го прочитате и да ми кажете што ви се допаѓа“. Многу ни помогна“, изјави глумецот.
Ако постигнат успех со „Распутин“, Дајан и Депардје се надеваат дека ќе ја продолжат „руската низа“. Сакаат да ја екранизираат „Капетановата ќерка“ од Пушкин, „Браќа Карамазови“ и други големи руски дела.