Градоначалникот на Општина Центар денеска до Основното јавно обвинителство го достави првиот дел од анализата на документите поврзани со проектот Скопје 2014. Андреј Жерновски изјави дека ревизорите ја завршија својата работа, дека тој денеска ја завршил својата работа со предавањето на документите, а сега останува веројатно најважното, а тоа е јавното обвинителство да ја заврши својата работа.
“Во овој документ, како што можевте вие да се уверите, односно да се увери јавноста, постојат сериозни индиции за незаконско работење, што претставува основ за постапување од страна на обвинителството“, изјави градоначалникот на Општина Центар, Андреј Жерновски.
>>Детали: Што откри ревизијата во општина Центар
Се разбира, рече, дека во целата оваа незаконитост, односно незаконско работење не треба да се бара вина само во локалната власт, туку гледаме инволвираност и од страна на централната власт, односно од Министерството за култура, кое што е директен поттикнувач на ова, односно според она што го има во документите за незаконското работење на локалната власт, односно Општина Центар.
“Овој чин денешен и овој предмет што го предадов претставува одлична шанса според мене, она што е најважно и според нашата јавност па би рекол и пошироко, претставува одлична шанса обвинителството да докаже дека не ги третира предметите различно туку дека ќе има подеднаков пристап, односно одлична шанса да докажеме дека судството во Р. Македонија сепак функционира и да почнеме полека да ги бришеме оние негативни коментари кои што ги добиваме од дома но и од Брисел дека имаме партизирано судство во Р. Македонија“, рече градоначалникот Андреј Жерновски.