Градоначалникот на општина Центар, Андреј Жерновски денеска пред мостот „Слобода“ кај Холидеј Ин, објави фотографии кои ги пронашле во едното од депоата во градот за кои прашуваат дали ова е оградата чија цена во неколку наврати во јавноста беше различно претставена.
.jpg)
-Пред две години, Коце Трајановски изјави дека оградата за овој мост ќе чини „само“ 1 милион евра, потоа од кабинетот на градоначалникот на Скопје беше објавена информацијата дека оградата ќе чини 1,8 милиони евра, за да еден месец пред изборите ова цената се намали на 1 милион и 180 илјади евра. Оваа ограда се уште не е готова, се чува во тајност, а очигледно е дека намерата е да не се вознемири јавноста пред избори, рече Жерновски.
– Се поставува прашањето не само до Коце Трајановски, бидејќи искерено не верувам дека тој стои зад сите овие проекти, туку до оној што е основоположник на оваа идеја, тоа е премиерот, Никола Груевски: зошто до сега се крие во јавноста ова што ние го најдовме во едно скопско депо?, праша тој.
Правејќи споредба од времето на управувањето на град Скопје со Ристо Пенов, Жерновски вели, во тоа време се изградија мостовите кај Хром и мостот „Близнаци“ со целосна инфраструктура и вкупно чинеле 1,5 милиони евра, додека овде се работи за милионска ограда.
– Каде отидоа парите на граѓаните на Центар, на Скопје на Македонија, побара одговор градоначалникот на Центар, посочувајќи дека прашањата кои ги поставува кон Трајановски и Груевски однапред треба да се избегнат со одговорот „фотомонтажа“.
Градоначалникот на општина Центар најави дека наскоро ќе објави и нови слики за тоа што се’ е пронајдено во депоата.
