Советниците на Општина Центар едногласно одлучија чувањето, одржувањето, заштитата и користењето на спомен обележјата од проектот Скопје 2014 на подрачје на Општина Центар да го отстапи на Град Скопје.
Само за одржување на фонтаната на Александар Македонски и двете фонтани во Вардар во изминатиот годишен период се потрошени околу 145.000 евра, од кои 35.000 евра само за струја.
За одржување на сите споменици и фонтани, не вклучувајќи ги плоштадите „Пресвета
Богородица“, „Карпошово востание“ и мостовите „Око“ и оној на уметноста, Општината на
годишно ниво има трошок од околу 255.000 евра.
>>Про и контра: Жерновски се откажа од одржување на СК 2014
За физичкото обезбедување Општината за период од две години ќе треба да плати речиси 60.000 евра. За одржувањето на вечниот пламен во паркот „Жена-борец“ општинската каса треба да е покуса за 7.000 евра а две полнења на резерватот во период од шест месеци чини околу 3.500 евра.
Ова, всушност, се смета како предлог за воспоставување меѓуопштинска соработка помеѓу Град Скопје и Општина Центар според одредбите на Законот за локална самоуправа, а меѓусебните права и должности да се уредат со договор што ќе го склучат двајцата градоначалници.