Градоначалникот на Центар, Андреј Жерновски најави дека неговата општина обезбедила средства за уште 11 нови објекти кои ќе имаат енергетско-ефикасни фасади, слични како зградата „Папагал“, која се наоѓа во близина на гимназијата Јосип-Броз Тито.
„Општина Центар продолжува со поставување на фасади со термичка изолација. Со ова, сметките за електрична енергија ќе бидат помали за една третина. За оваа година се обезбедени средства за уште 11 нови фасади“, рече Жерновски.
Тој напомена дека е свесен дека има страни на кои им се допаднала фасадата во бои, но и дека има такви кои негодуваат, а сепак зградата предизвикува насмевка кај минувачите.
Сепак, градоначалникот на Центар потенцираше дека, сите промени кои ги прави општината, мора да се во согласност со фамилиите кои живеат во нив.
Авторка на реконструкцијата е архитектката Искра Ефремова, а зградата во центарот на Скопје која во 60-тите била позната под името „Папагал“ и била сива со пет темни бои на терасите (црна, темна-окер, темна-виолетова, темна-зелена, и темна-тегет), сега „е облечена“ во неколку бои, во модерен стил препознатлив за тоа време.
>> Зградата „Папагал“ му пркоси на барокот во Скопје
Во однос на ГТЦ, Андреј Жерновски го повтори ставот дека согласно актуелниот ДУП и законската регулатива, не може да се реконструира фасадата на ГТЦ во барок, но посочи дека власта е во рацете на други и дека тие можат во секој момент да ја сменат фасадата, зошто веќе е почната постапката.
За натамошните чекори, најави Жерновски, ќе се одлучува дополнително.