1,5 милион евра поранешни градоначалници, раководители и скулптори потрошиле за патувања во Италија, соопшти градоначалникот на Општина Центар, Андреј Жерновски на пресот одржан пред зградата на Јавното обвинителство.
Одговарајќи на прашањето на советничката Весна Милосавлевска, дали има информации за потрошена голема сума пари за патување до Италија од екс-градоначалници, скулптори и вработени во општината, Жерновски одговори дека 57 лица на товар на Општина Центар патувале во Фиренца, Верона, Милано за поблиску да се запознаат со условите каде ќе се леат спомениците од проектот Скопје 2014.
Тие патувања се однесуваат на скулпторката Валентина Стефановска- таа била во Италија 25 пати, додека поранешниот претседател на Советот, Владимир Здравев- 8 пати.
Нејасно е, рече Жерновски зошто тој морал да отиде во Италија, а уште помалку што бара екс-раководителот на секторот урбанизам, или пак екс-раководителката за јавни набавки.
-Трошокот за авионски билети е нешто помалку од 1 милион евра, или вкупно 1.5 милион евра се потрошиле за патување и сместување во Италија. Прашувам што барал претседателот на Советот таму и кој се согласил буџетот на Центар да се олесни за 1.5 милиони евра, изјави Жерновски.
Градоначалникот на Општина Центар денеска до Основното јавно обвинителство го достави првиот дел од анализата на документите поврзани со проектот Скопје 2014. Андреј Жерновски изјави дека ревизорите ја завршија својата работа, дека тој денеска ја завршил својата работа со предавањето на документите, а сега останува веројатно најважното, а тоа е јавното обвинителство да ја заврши својата работа.
На прес конференцијата одржана во понеделникот ревизорите Слаѓана Тасева и Драган Малиновски ги обзнанија наодите од првиот дел од ревизијата.
>>Детали: Што откри ревизијата во општина Центар
Еден од поинтересните заклучоци на експертите се деталите околу спроведената постапка за споменикот на Никола Карев. Основната вредност на договорот била 4 милиони денари за лиење на споменик во бронза, но подоцна овој споменик значително поскапел за дополнителни 45.000.000 евра кои биле побарани поради „трошоците за мермер за споменикот“. Комисијата на лице место констатирала дека споменикот не е од мермер, туку од бронза.
Скулптурата на Никола Карев ја изработил Благоја Ангелковски. За идејното решение добил хонорар од 35 илјади евра. Изработката на идејниот проект чинела 169 илјади евра. Вредноста на договорот за лиење, пак, изнесувала околу 880 илјади евра. Севкупно, за бронзениот Карев кој поскапел само поради тоа што требало да биде во мермер, биле потрошени 1.221.739 евра.