Жителите на Волково повторно се измамени од несовесното работење на градоначалникот Сокол Митровски, соопшти денеска пред новинарите, Снежана Трајковска, координаторот на советничката група на Сојузот за иднината во општина Ѓорче Петров.
Советничката група на Сојузот за иднината во Општина Ѓорче Петров на денешната седница се спротивстави и не гласаше за одлуката на градоначалникот Сокол Митровски и советничката група на ВМРО-ДПМНЕ и коалицијата, за ПРЕНАМЕНА на средства од самопридонес за фекална канализација во реонот на Волково.
Вкупниот износ што треба да се пренамени е 3.250.000,00 денари.
Оваа пренамена се врши по трет пат, и до сега 17 милиони денари од ставката за изградба на фекална канализација се пренаменети за други цели на општината.
Еве ја одлуката на градоначалникот Сокол Митровски, која тој и советниците на ВМРО-ДПМНЕ денес ја изгласаа:
По разгледување и анализирање на расходите според Извештајот за извршување на Буџетот на општината за 2013 година, се согледа дека одредени позиции сме ги планирале на понизок износ , се покажува дека нема да се доволни според обврските што се создаваат. Поради тоа се предлага да се зголемат позициите на правни услуги, бидејќи кога се планираше основниот буџет сме немале сознание дека ќе се склучуваат договори со граѓаните во реонот на с. Волково за самопридонесот. Трошоците за заверка кај нотар паѓаат на терет на општината. Потоа, се предлага да се зголемат средствата за телефон, за услуги за копирање и печатење, за поправка и одржување на софтвер и хардвер, за договорни услуги на социјалците, кои ја одржуваат јавната чистота и зелените јавни површини во општината,за изградба на нови линии на улично осветлување и за трансфери до спортски клубови. Вкупниот износ што треба да се пренамени е 3.250.000,00 денари.
Со оваа лоша проценка, вели Трајковска се јавува дефицит во општинската каса која градоначалникот Сокол Митровски одлучува да ја покрие од самопридонесот на жителите на Волково.