Португалскиот режисер и актер Жоао Салавиза, ќе биде гостин на 36.издание на фестивалот Браќа Манаки во Битола.
Салавиза, кој важи за еден од најнаградуваните млади режисери, ќе го промовира својот прв долгометражен игран филм „Планина“, веднаш по светската премиера на Филмскиот фестивал во Венеција, закажана за денеска.
Со неговиот филм на 19. септември ќе биде отворена програмата Нов европски филм што се воведува годинава на фестивалот во Битола.
Португалецот е добитник на престижните награди Златна палма во Кан за „Арена“ (2009) и Златна мечка во Берлин за „Рафа“ (2012).
На овој филм пак тој соработува со директорот на фотографија Васко Вијана, кој за филмот „Рафа“ ја доби наградата Мала златна камера 300 во Битола.
– Филмовите на Вијана импресионираат со едноставната структура и живата презентација на малите секојдневни проблеми во животот. Во нив Лисабон не е сјајното место што го гледаме на туристичките реклами туку во најголем фокус е предградието на Лисабон. Во сите негови филмови главните актери се тинејџери кои имаат проблем со слободата, а Салавиза е филозофот што покажува дека понекогаш луѓето што се на слобода се помалку слободни од оние со ограничена слобода. Во соработката со Вијана, Салавиза создава и повеќе од интелигентен визуелен свет заради што ни е повеќе од чест што гостува во програмата Нов европски филм – вели селекторот на програмата, Дејан Трајкоски.
Веднаш по промоцијата во Битола, филмот на Салавиза ќе биде прикажан на престижниот филмски фестивал во Сан Себастијан.