Здружението на новинарите на Македонија (ЗНМ) и Советот за етика во медиумите на Македонија (СЕММ) реагираат на објавите со измислените изјави поврзани со градоначалникот на Струга, Рамиз Мерко, со оценка дека на овој начин јавноста може да се доведе во заблуда и да се шират дезинформации.
Иако станува збор за содржина од сатиричен карактер, велат од таму, медиумите што во јавноста се препознаваат како професионални не треба да го занемарат фактот дека ваквите содржини лесно може да бидат прифатени од пошироката јавност како вистинити, особено ако темите се во контекст на актуелни политички случувања.
Станува збор за објавата во неколку медиуми, во која се вели дека градоначалникот на Струга, Мерко, „јадел често и на сила само за да ги помогне на угостителите, а тоа било платено од страна на Општината“, при што на крајот од текстот е наведено: „Прочитајте ја целата сатирична вест на порталот „Кооперација“.
„Им укажуваме на медиумите доколку користат вакви објави, кои имаат сатирична содржина, најмалку што може да направат уредниците е на многу јасен начин, на почетокот на текстот, да истакнат дека станува збор за измислена содржина. Притоа треба да се свесни за можноста од дезинформирање на граѓаните, особено имајќи предвид дека читателот често се задржува на насловот и кратко поминува низ содржината на објавата. Во услови кога ширењето дезинформации е сериозен проблем, несоодветното и неодговорно користење сатирични содржини, кое привлекува големо внимание и на социјалните мрежи, во јавноста може да се толкува како тенденциозен обид за злоупотреба на медиумот правејќи штета на угледот не само врз конкретната индивидуа туку и на општествените процеси“, велат од ЗНМ и СЕММ.