ЗОИ 2014 – ЛГБТ заедницата во Сочи ќе ги брани своите права преку симболика

Том Дејли, британскиот нуркач кој освои бронза на Олимписките игри во Лондон 2012 година, е последниот спортист кој јавно ја изрази својата сексуална ориентација. Во видео на каналот „ЈуТјуб“ со цел да ги прекине шпекулациите, Дејли соопшти дека е хомосексуалец

И покрај руската пропаганда, односно законот кој забранува дискусија за правата на хомосексуалците и врски пред малолетници, неколку геј-спортисти планираат да присуствуваат и да се натпреваруваат во Зимските олимписки игри во Сочи.

Организациите за правата на ЛГБТ заедницата планираат неколку начини за да се спротистават на законот без да го прекршуваат, преку веење на знамиња-симболи на ЛГБТ припадниците, држење за раце за време на церемонии, дури и носење на качулки со цитат од Принципот 6 од Олимписката повелба која забранува дискримнација во било која форма за време на игрите.

Според Интернационалниот олимписки комитет, спортистите ќе имаат можност да даваат изјави против законите на прес-конференции, но можат да се соочат со обвиненија ако истото го направат на подиумите или олимписките стадиони.

Инаку, претседателот на Русија, Владимир Путин во јануари изјави дека забраната се однесува само за пропагирање на хомосексуалноста.

„Нема забрана на нетрадиционалните форми на сексуални односи меѓу луѓето. Ние имаме само забрана на пропагирање на хомосексуалност“, беше пораката која рускиот Претседател ја упати на средбата со младите доброволци кои ќе бидат ангажирани во Сочи за Олимписките игри.