Пратеникот Самка Ибраимовски денеска пред новинарите праша зошто МВР и министерката Јанкуловска не реагираат за корупцијата во случајот Интермаркет.
Ибраимовски соопшти дека деновиве е соочен со барање за наплата на пресуди за случајот Интермаркет за коишто постојат наводи дека се криминални.
„Уште пред 5 години испратена е ургенцијата до Секторот за организиран криминал а запознаена е и министерката Јанкуловска лично во нејзиниот кабинет, дека пресудите што ги донесе Основниот суд во Тетово, според овој документ, се коруптивни. Но, досега нема никаква реакција од МВР. Во известувањето до МВР е приложен документот на којшто се потпишани тројца најголеми акционери во фирмата Интермаркет.
– Акционерите потврдуваат дека тогашниот директор Сашо Мазнески им барал пари за како што им рекол издејствувани позитивни пресуди во основните судови, Апелациониот суд во Скопје и Врховниот суд.
– Мазнески, според акционерите кои се подготвени и лично да го кажат ова пред надлежните органи, со 14 илјади евра потплатил судии да донесат пресуда во негова полза.
Што е ова, ако не е е корупција во судството, една од најкритикуваните области во сите извештаи на Европската унија?“, прашува Ибраимовски.
Тој од министерката Гордана Јанкуловска и од директорот на Бирото за јавна безбедност Митко Чавков јавно побарал најсериозно да го разгледаат овој коруптивен случај, срам за македонското судство.
Да потесетиме, во 2006 кога Самка Ибраимовски беше актуелен заменик-министерот за труд и социјална политика судот во Тетово присилно ја исели “Униус ИС”, фирмата на Ибраимовски од просториите на “Интермаркет”.
Во образложението на пресудата пишуваше дека Ибраимовски изминативе години бесправно го управувал имотот на “Интермаркет”, иако не бил доминантен сопственик. Судот утврдил дека вистински газда на “Интермаркет” е Петре Димовски, поранешен директор и еден од најголемите акционери во компанијата.
Реакција од МВР на пресот на пратеникот Самка Ибраимовски:
МВР целосно ја почитува професионалноста и независноста на судската власт и нема да си дозволи мешање и коментирање на работата на судовите.
Министерството крајно сериозно го разгледува секој случај и секогаш се постапува согалсно нашите ингеренции.
Кривични пријави, согласно законот, поднесуваме врз основа на обезбедени докази, а не врз основа на нечии желби или нарачки.