Како да се преживеат празниците и да има доволно инсулин за сите. Оваа мисла ги мачи дијабетичарите кои велат дека ги „цепкаат“ инсулините за да има за сите и да траат што подолго. Иако беше ветено донациите на инсулини ќе траат месец и половина, дијабетичарите ја кратат терапијата за да има за сите пациенти кои се зависни од инсулин.
„ Нема нови инсулини, уште се од донација. Утринава наместо шест, земав три пенкала за мене, оставив три за некој друг што му е потребно. Вчера дадов четири пенкала, одиме по селата на деца им носиме. Вие не знаете како е дете да остане без инсулин, родител да оди по болници ноќе да моли“, изјави Димче Велев претседател на здружението „Шеќерче Лилипоп“, од Велес кои утринава му испратија писмо на премиерот Заев, да ја прекине агонијата и да стави крај на инсулинската криза.
Ова е документот од кој се гледа дека Димче Велев утринава не го подигнал она што му следува, шест пенкала со инсулин, туку земал само три инсулини од донацијата, за да има за некој друг.
На овој начин или преку социјалните мрежи си помагаат и си позајмуваат инсулини луѓето со дијабетес кои с е зависни од инсулин. А, ги има околу 40 000 во државата, од нив околу 500 се деца.
И Вера Милошевска Гладкова раскажува дека утринава подигнала инсулин Новомикс 30, кој е донација од Ново Нордиск. Оваа 60 годишна се плаши за својот живот бидејќи не знае до кога ќе го има инсулинот во аптеките.
„ Утринава кога земав инсулин, од оригиналниот од донација аптекарката ми дека од утре нема да има и не се знае до кога ќе нема бидејќи борбата за тендер ќе траела долго и не се знае колку долго ќе трае кризата со инсулин. Овој инсулин што ни го донирале е пред истек на рокот, до април 2018. Аптекарката ми потврди дека открила една кутија која поминала низ неколку земји, Бразил, Сирија, Турција и го пријавила во Агенција за лекови. Се ова штос е случува со инсулинот ми е многу сомнително и не знам што да мислам. Најверојатно си играат некакви игри, а ние пациентите страдаме“, изјави за НОВА Вера Милошевска Гладкова.
Од друга страна портпаролот на Владата Миле Бошњаковски денеска изјави дека нема инсулинска криза и оти има доволно залихи на инсулин.
„Нашите информации говорат дека во моментов има доволно залихи и не постои инсулинска криза“, изјави Бошњаковски, најавувајќи дека новиот министер наскоро ќе излезе на прес-конференција и јавноста ќе има повеќе информации за овој проблем.
Се огласија и од Министерството за здравство. Од таму тврдат дека инсулинска криза нема.
НОВА неофицијално објави дека надлежните правеле тендер за инсулини во четири очи иако постоечкиот тендер важи до јуни 2018 година. Која е причината за ова нема објаснување од надлежните. Анализите на последната пратка на инсулини се завлекоа цел месец од непознати причини, а Министерството за здравство не излегло до сега со официјални информации да објаснат што се случува и зошто настана инсулинската криза.