Поранешниот министер за труд и социјала Диме Спасов пуштил во употреба Центар за деца со оштетен вид од предучилишна возраст во Велес иако такви деца во овој град нема. Центарот е пуштен во употреба во октомври 2015 и скоро две години не профункционирал од причина што во Велес не е регистрирано ниту едно дете со оштетен вид до шест години.
И не само тоа, во овој Дневен центар кој пред две години свечено го пуштија во употреба Спасов и пратеникот од ВМРО ДПМНЕ, Илија Димовски, како и градоначалникот Димитар Чадиев воопшто нема ниту еден вработен.
Од друга страна, во Велес се регистрирани околу 30 деца од предучилишна возраст со различен вид на попреченост за кои не постои Дневен центар. Од тие причини директорката на Центарот за социјална работа, Азиза Џини побарала согласност од Министерството за труд и социјала, Центарот за деца со оштетен вид од предучилишна возраст да се пренамени во Дневен центар за деца со пречки во развојот од предучилишна возраст.
„ Нема деца со оштетен вид од предучилишна возраст во Велес. Јас им кажав дека имаме деца со посебни потреби на кои им е потребен ваков Дневен центар, но тие одлучија да биде за деца со оштетен вид. Дури ми беше срам и изјава да дадам кога го пуштаа во употреба. Тоа беше објект на Агенцијата за вработување кој со инвестиција од општината и донација беше реновиран и опремен, но не предвиделе нови вработувања. Таму е потребна медицинска сестра и дефектолог“, изјави за НОВА Азиза Џини, директорка на Центарот за социјална работа во Велес.
Тогашното раководство најави дека Министерството за труд и социјала и општината обезбедиле 1,5 милиони евра за овој Дневен центар. Беше најавено дека Ценатрот ќе има капацитет од 25 места, а во него првично ќе бидат сместени 12 деца со оштетен вид од Велес и дека очекуваат бројот на деца кои ќе го посетуваат да се зголеми.
Во Министерството за труд и социјала велат дека се запознаени со проблемот и врз основа на споменатата анализа на терен, ќе се преоцени потребата за пренамена на овој Дневен центар, согласно утврдените потреби на децата на територијата на Општина Велес.
Но, овој Дневен центар кој спектакуларно беше најавен во јавноста од претходната власт не е единствениот во државата кој стои со клуч на врата. Во повеќе градови во државата реновирани и изградени се повеќе различни центри за лица со посебни потреби кои никогаш не профункционирале бидејќи во нив нема вработени.
Спасов тогаш изјави дека се изградени 27 центри и најави изградба на уште седум. НОВА истражуваше и дојде до податоци дека никогаш не профункционирал Дневниот центар за деца со посебни потреби во Богданци иако е реновиран и опремен, но во него нема вработен кадар.
Не функционира ниту Дневниот центар за деца со аутизам во Охрид кој е опремен и реновиран, но не работи бидејќи нема вработени. Никогаш не профункционирале ниту Дневните центри во Неготино, Македонска каменица, Гевгелија од причина што во нив нема вработени. Во Центарот Штип има двајца вработени, но дознаваме дека се несоодветен кадар за работа со овие деца.
Се градело без план и стратегија, но и покрај тоа објектите се пуштале пред медиумите, се сечеле ленти од страна на Диме Спасов и од тогашниот премиер Никола Груевски.
Центарот кој бил предвиден за деца со церебрална парализа во Кисела Вода во февруари годинава бил отстапен на вработените од Центарот за социјална работа и таму сега е сместена администрацијата.,
Од Македонска Каменица децата со посебни потреби патуваат во Делчево бидејќи Дневниот центар кој бил два –три пати пуштан во употреба нема вработени и воопшто не е отворен.
Овој Дневен центар било планирано да го посетуваат 60 деца. Директорот на Центарот за социјални работи во Делчево за НОВА вели дека не знае дали воопшто е комплетиран овој центар во Македонска Каменица и рече дека од Советот на општината ќе бара да биде префрлен во надлежност на Министерството з а труд и социјала.
„Дневниот центар за деца со посебни потреби воопшто не е ставен во функција, а не знаеме ниту дали е комплетиран со инвентар и опрема“, изјави за НОВА Николче Захариевски, директор на Центарот з а социјална работа во Делчево, под чија надлежност е и Македонска Каменица.
Вработените во Центарот з а социјална работа во Неготино исто така потврдија дека Дневниот центар за деца со посебни потреби не функционира.
„Не е отворен Центарот воопшто и не можеме да бараме нови вработувања кога не функционира“, потврдија вработените од таму.
Во Министерството за труд и социјала потврдуваат дека постојат случаи каде што се завршени градежните работи и опремување на дневни центри за деца или лица со посебни потреби, но тие не функционираат затоа што откако се изградиле и опремиле не се обезбедил стручен кадар.
„Практично, постојат празни објекти, кои биле свечено отворани, но не се вработил кадар за да може да даваат услуги на лицата за кои биле наменети. Такви случаи се во Неготино, Македонска Каменица, Охрид и Гевгелија.
Изградбата, пак, на ваков објект во Штип, првично била договорена со градоначалникот, при што се утврдила локација. МТСП започнало со премер и проценка на буџет, но постапката запрела откако се утврдило дека посочениот објект не е сопственост на општината, туку на Министерството за култура“, велат од стручните служби во ова Министерство.
Од МТСП посочуваат дека во претходниот период отворањето на овие центри не се засновало на претходно направена анализа за потребите на граѓаните за оваа форма на заштита.
„Моментално, Министерството за труд и социјална политика заради унапредување на заштита на овие ранливи категории спроведува анализа за потреби на граѓаните во местото на нивното живеење, а воедно воспостави и соработка со граѓанските здруженија со цел да се утврдат реалните потреби на оваа ранлива категорија. На овој начин се овозможува стратешкото планирање на министерството да одговори на потребите на граѓаните за да добијат соодветни услуги во местото каде што живеат“, велат од Министерството за труд и социјала.
Од таму ја потенцираат и соработката со Делегацијата на ЕУ во Скопје од каде е обезбедена е експертска помош за ревидирање на Националната стратегија за деинституционализација 2008-2018, изготвување на нов стратешки документ и акциски план за развој на вон институционалните форми на заштита.