Берлин: Полицијата во германскиот главен објави фотографија од 21-годишното момче осомничено за нападот со автомобил врз група луѓе собрани за „Парадата на гордоста“. Еден човек загина, а најмалку 16 се повредени. Во тек е потрага по осомничениот низ градот, пренесува АП.
Според германските власти, станува збор за осомничениот идентификуван како Абдул Б.. Нападот се случи синоќа, кога белиот минибус кој го возел напаѓачот влетал во толпа луѓе во паркот „Тиргартен“, во близина на трасата на која се движеле учесниците на „Прајдот“.
Портпаролот на берлинската полиција, Флоријан Нат, изјави дека осомничениот им е познат на безбедносните служби и дека постојат сомневања за негова поврзаност со исламистички кругови во Берлин. Според информациите на германската новинска агенција ДПА, тој во мај годинава бил ослободен од установа за малолетни и млади престапници.
Надлежните ги повикаа граѓаните, доколку го забележат, да не се обидуваат самите да го задржат бидејќи е можно да е вооружен и опасен.
По нападот, организаторите ја прекинаа манифестацијата и ги откажаа преостанатите активности.
Полицискиот портпарол Флоријан Нат изјави дека истражителите ги проверуваат сведочењата според кои напаѓачот и откако излегол од возилото, извадил нож и се обидел да нападне луѓе од групата.
Дел од очевидците тврдат дека неколку повредени се здобиле со убодни рани, додека други изјавиле дека виделе лице облечено во црна облека кое носело мачета. Полицијата засега не ги потврдува овие информации и наведува дека тие се предмет на понатамошна истрага.