Најголем дел, околу 90 отсто од барањата и препораките на граѓанскиот сектор од Балканот се прифатливи, само треба да се најде начин за нивна имплементација – оцени еврокомесарот за проширување Јоханес Хан денеска во Трст, откако присуствуваше на средбата меѓу претставниците на цивилниот сектор и шефовите на дипломатиите на земјите од Западен Балкан.
Тој најави дека Европската унија во следните 3 години во државите од Западен Балкан ќе инвестира една милијарда евра. Изградбата на железничката пруга од Коридор 8 која треба да ги поврзе Јадранското и Црното море преку Македонија е еден од проектите што ќе ги финансира ЕУ.
Заев: Македонија е голем добитник од овој Самит
Македонскиот премиер, Зоран Заев, кој учествува на Самитот ЕУ-Западен Балкан во Трст, изјави дека се работи за навистина важен настан на кој се расправа за перспективите на целиот регион и на Европската Унија, но и секако за регионалното поврзување.
– Пораките кои овде ги добиваме, а и оние што ние ги испраќаме се дека ние ќе го поддржиме целиот овој процес, ќе соработуваме за да може да напредува регионот, секако сам за себе, но и во перспективите кон ЕУ. Состаноците кои овде се држат не само што ќе ја зголемат соработката, поврзувањето, транспортот, економијата помеѓу сите овие земји туку верувам дека ќе испратат силен сигнал фокусот на Европа да биде сè повеќе насочен кон овој регион, поддржувајќи го за навистина севкупните вредности на овој регион да се приближат кон вредностите кои Западна Европа ги познава. Само на тој начин ќе се забрзаат сите процеси за целосна интеграција на Македонија во ЕУ, изјави Заев.
На новинарско прашање дали може да каже некои конкретни точки од она што е договорено, македонскиот премиер одговори дека сè ќе биде објавено официјално, со точни цифри, но потенцира дека „Македонија е голем добитник од овој Самит“.
-Ќе има конкретна поддршка за изградба на инфраструктура, многу значајна за идните пред сè економски, но и севкупни перспективи на поврзувања на Република Македонија со регионот и Европа, рече Заев.
Димитров до граѓанскиот сектор: Не се двоумете дали да не критикувате
По вчерашниот целодневен Форум на Цивилното општество, барањата на министрите и на еврокомесарот им ги презентираше Срѓан Сушиќ, консултант на германската Фондација Хајнрих Бел, која е соорганизатор на настанот.
Министрите, меѓу кои и шефот на македонската дипломатија Никола Димитров, позитивно реагираа и побараа од граѓанскиот сектор уште поактивна улога. Димитров ја истакна улогата на цивилниот сектор во неодамнешната криза во Македонија, оценувајќи дека таа помогнала во евроинтеграциските процеси, соопштија организаторите.
-Желбата на регионот е да влезе во ЕУ. Веќе изгубвме многу време и крајно време е да ја завршиме работата. Критичкиот однос е многу важен и затоа немојте да се двоумите дали да не критикувате, изјави Димитров.
Препораките се однесуваат на демократските процеси, владеењето на правото, деловното опкружување и иновациите, енергијата и климатските промени и слободата на говорот и улогата на медиумите, што беше посебно потенцирана од еврокомесарот Хан, како многу важен услов за евроинтеграциите и како критична точка во регионот.
-Медиумските слободи можат да бидат унапредени само доколку создадеме медиумски пазар и со тоа да им овозможиме на медиумите да не бидат зависни од финансиска помош“, оцени Хан.
Состанокот на Западен Балкан со ЕУ, треба да заврши вечерва со заедничка декларација и со одлуки кои ќе бидат серозно придвижување кон регионалната соработка и забрзување на евроинтеграциските процеси.