Прогресот во поглед на слободата на изразување и слободата на медиумите во Македонија, споредено со последната Speak Up! конференција е голем: ако пред две и пол години беше во несвест, денеска македонското новинарство е во длабока кома, потенцираше денеска во Брисел на конференцијата за состојбата во медиумите во Западен Балкан и Турција, новинарот Боби Христов.
– Новинарството во Македонија е мртво. Медиумите, со мали исклучоци, одамна веќе не и служат на јавноста туку на политиката, а пропагандата а не објективната информација се главниот инструмент на медиумите потчинети на Владата. И тоа е резултат на долгорочна, систематска и добро обмислена владина политика на целосно ставање под своја контрола на водечките медиуми, рече Христов.
Тој дополни дека лојалноста на одредени новинари во Македонија се купува со стотици илјади евра, па дури и милиони – пари од владини реклами кои се насочуваат главно кон медиумите кои и се наклонети на власта, што често е констатирано и во релевантни меѓународни извештаи за состојбата со медиумската слобода во земјава.
– Нашиот премиер деновиве изјави дека во Македонија има многу слобода! За лошите рејтинзи на листите на Фридом Хаус или Репортери без границии претседателот на државата рече дека се само перцепција, потсети тој.
Тој зборуваше како во Македонија со пари од буџетот, преку владините реклами, се наметнува политика на глорификација на власта и атак и сатанизирање на опозицијата и дека Јавниот сервис функционира како класична партиска или државна телевизија.
– Македонските новинари имаат меѓу најниските плати во регионот, една третина работат без постојан договор. Во такви услови голем дел од новинарите немаат основна егзистенцијална, сигурност, поради што се лесна мета за притисок и потчинувањ, смета Христов.
Тој пред колегите во Брисел нотираше дека постои длабока поделеност меѓу новинарите: поголем дел се во таборот поддржувачи на власта, помал дел во таборот поддржувачи на опозицијата и кои буквално водат војна меѓу нив.
– Да се критикува власта значи дека веднаш ќе бидете прогласен за предавник, платеник на опозицијата или соросоид – што е омилена формулација на владините поддржувачи, рече пред колегите новинарот Христов.
Тој смета дека Европската Комисија не сменила многу во Македонија бидејќи инструментите на влијание врз властите се како што се покажува во практика, несоодветни.
Христов забележа и дека финансиската помош за поддршка и промоција на медиумските слободи била погрешно насочена, најчесто кон невладини организации кои немаат допирна точка со медиумите, наместо кон самите медиуми.
– Speakup порасна , стигна до број 3. Доколку сакаме да одбегнеме и на следната конференција да ги повториме истите констатции дека ситуацијата е полоша, наместо да се подобрува, сметам дека она што е неопходно не се само заложби ,декларации и стратегии туку конкретни политики и мерки, ориентирани кон резултати. Во случај на македонското досие тоа би биле конретни мерки со кои ќе се гарантира надминување на лошата состојба со непочитување на работничките права, департизација на Јавниот сервис и деполитизација на регулаторните тела, транспарентни правила за дистрибуцијата на владините реклами, порача Христов на Speak Up! 3 конференцијата во Брисел.