Пратеници од ВМРО ДПМНЕ поднеле барање за интерпелација на министерот за министерот за земјоделство, Љупчо Николовски бидејќи сметаат дека тој е најодговорен за неажурноста при справување со пожарите и нерешените проблеми на земјоделците.
-Како резултат на несериозноста, неодговорноста и некомпетентноста на министерот Љупчо Николовски, Република Македонија скоро еден месец е во пламен. Николовски немајќи капацитет да се справи со настанатата ситуација на терен, дозволи состојбата да ескалира во граници кога е мошне тешко да се контролира и истовремено штетите достигнаа до алармантно ниво, изјави пратеникот Зоран Илиоски.
Тој обвини дека поради инертноста на министерот Николовски се создадени проблеми и во делот на доставувањето на основни податоци и прецизни информации, со што е оневозможено да се донесуваат конкретни одлуки и да се изготвуваат оперативни планови за справување со огнената стихија.
ВМРО ДПМНЕ смета дека Николовски не успеал да се справи и со други проблеми кои што секојдневно се појавуваат кај земјоделците.
-Изостана неговото ангажирање во справувањето со проблемот со откупот на земјоделските производи, пред се на овошните производи праски и нектарини. Неговиот игнорантски и неодговорен однос кон проблемите со кои се соочуваат овоштарите нанесе огромни штети во овој сектор, подеднакви како кај секој индивидуален земјоделски производител, изјави Илиоски.
Според него, до сега во македонското земјоделство не се случило да изостане разработена стратегија за организиран откуп на пченицата, овесот, јачменот и останатите житарици.
Петре Шилегов, на најавената интерпелација, одговори дека е „уште еден доказ дека може да се зборува за се, освен за кривична одговорност на раководството на ДПМНЕ“.
-Хаосот по институциите којшто е резултат на 11-годишното партизирано и криминално владеење на ДПМНЕ, со натчовечки напори се обидуваме да го надминеме во изминативе два месеци. Не може да биде причина за разрешување на министер од Владата од СДСМ. Тие луѓе, луѓето вработени во институциите со натчовечки напори во изминатиов период успеваат да се справат со пожарите, напоменувам дека ниту специјалните авиони за гасење на пожар не беа функицонални, не работеа се до доаѓањето на новата власт. Правиме се и во надлежните институции се прави се да се надмине таа хаотична состојба која дошла како резултат на непрофесионално, некомпетентно и пред се криминално тендерско работење на сегашната опозиција, рече Шилегов, одговарајќи на новинарско прашање.