Кабинетот на Претседателот, Ѓорге Иванов денеска излезе со реакција во која ги демантира тврдењата на портпаролот на СДСМ, Петре Шилегов и ја повика партијата да објави трансфер на пари преку фирмата која е регистрирана во Панама.
„Сметаме дека обидот преку лаги и манипулации да се претстави семејството на Претседателот Иванов како дел од криминална банда е крајно недолично и неодговорно однесување на една политичка партија. Ја повикуваме политичката партија СДСМ веднаш да го објави секој трансфер на пари преку таа фирма и да ги соопшти сите кои биле вклучени во било што на таа фирма, која патем е основана во Скопје и никогаш не проработела. Во спротивно, Шилегов ќе мора своите тврдења да ги докаже на суд. Фирмата „Делфино травел Балканс“ e основана во 2009 година во Скопје со сметка во ТТК Банка во Скопје и е избришана од Централен регистер во 2015 година, согласно Законот за трговски друштва ч.552-б“, се вели во реакцијата.
СДСМ денеска на прес конференција обвини дека потесното семејство на претседателот Ѓорѓе Иванов има бизниси кои се врзани со државата која важи за даночно прибежиште Панама. Шилегов обвини дека братот на сопругата на Иванов, Маја Иванова, има бизнис релации со фирмата „Лип Корп Панама Сити“ од Панама.