Загадувањето на воздухот е еден од главните фактори за смртност кај децата бидејќи тој воздух трајно ја преминува границата меѓу крвта и мозокот и трајно го оштетува детскит мозок во развој, се вели во соопштението кое со предзнакот „Алармантно“ денеска го испрати Детската амбасада „Меѓаши“. Тие тврдат дека со овие политики на негрижа и отсуство на мерки против екстремно загадениот воздух во Македонија на децата им е загрозено најелеметарното право – правото на живот според членот 6 од Конвецијата за правата на дететот која што ја потпиша и Република Македонија.
Децата се најосетливата група, затоа што имаат организам во развој и побрзо дишење, а со тоа и побрзо внесување на загадените материи во телото. Секое второ болно дете минатата година се лекувало од респираторни болести кои најчесто се директна последица на загадениот воздух. Децата се најпогодени, особено во грејната сезона, кога концентрацијата на цврстите честички е зголемена. Децата се најосетливата група на сите загадувања од животната средина „пред сè затоа што имаат организам во развој, затоа што имаат позабрзано дишење и поголема глад за воздух од возрасните и затоа што се немоќни што било да сменат. Значи ги чекаат нашите акции и политики. Така што, бројни се последиците од аерозагадувањето по разни делови на организмот, а кај децата фокусот е врз белодробниот систем, вели доктор Драган Ѓоргев од Институтот за јавно здравје.
Децата се почувствителни од возрасните на внатрешно и надворешно загадување на воздухот, бидејќи нивните бели дробови, мозокот и имунолошкиот систем сè уште се развиваат, а нивниот респираторен тракт е попорозен. Исто така, малите деца дишат побрзо од возрасните и вдишуваат повеќе воздух во однос на телесната тежина.
Истражувањето Прочистете го воздухот заради децата (УНИЦЕФ), укажува дека загадувањето на воздухот е важен фактор за смрт на речиси 600.000 деца помлади од пет години секоја година и е закана за животите и иднината на милиони секој ден. Ниту едно општество не смее да си дозволи да го игнорира аерозагадувањето, велат од „Меѓаши“.