Министерството за внатрешни работи нема добиено допис од турското МВР за фалсификувани лекови откриени во Турција, а увезени во Република Македонија во последните две години и пред тоа, потврдија за НОВА од МВР. Но, од таму потенцираат дека со оглед на фактот дека ОЈО има покренато предистраќна постапка МВР е подготвено да постапи по добиени насоки и наредни од обвинтелството.
„Со оглед на фактот дека Јавното обвинителство веќе има отпочнато предкривична постапка околу споменатата проблематика, ве известуваме дека сите надлежни организациони единици при МВР се подготвени и ќе постапуваат доколку (согласно Законот за кривична постапка) од страна на надлежното обвинителство бидат добиени насоки и наредби за постапување. Исто така, а во контекст на претходното, МВР ќе постапува и по пријави од граѓани, сознанија и други извори на информации, со оглед на сериозноста на кривичното дело, а со цел заштита на здравјето на граѓаните“, се вели во одговорот на МВР до НОВА..
Од МВР извесуваат дека Одделот за сузбивање на организиран и сериозен криминал (ОСОСК) при МВР во чија што надлежност е ваков вид на криминал во 2014 година работел на предмет за фалсификуван лек на пријава од Агенцијата за лекови, која пак за ова била известена од страна на домашна компанија.
„Во тој предметен случај ОСОСК при МВР, во соработка со Агенцијата за лекови изврши контрола во повеќе аптеки низ Македонија, како и во една веледрогерија, при што во дел од аптеките беа пронајдени фалсификувани пакувања од лекот со содржина, стаклени ампули, во кои по вештачењето од страна на Агенцијата за лекови е утврдено дека станува збор за друг лек кој бил увезен од соседна земја во текот на 2013 година, како паралелен увоз. За истото од страна на ОСОСК е известено Основното јавно обвинителство за гонење на организиран криминал и корупција, каде по нашето известување е отворен предмет, а воедно од страна на ова обвинителство се добиени наредби и насоки за постапување, по кои ОСОСК достави известување. Од страна на Агенцијата за лекови по потврдувањето на вештачењето на содржината се доставени кривични пријави до Основното јавно обвинителство за гонење на организиран криминал и корупција“, велат во МВР.