Разрешени се директорите на две скопски клиники. НОВА дознава дека од директорската функција на Клиниката за уво нос и грло е сменета Габриела Копачева Барсова, а на нејзино место е назначен Јане Нетков, лекарот кој во време на министерувањето на Таравари беше назначен, па веднаш потоа сменет со образложение дека настанал превид.
Од директорската функција на Клиниката за детска хирургија е сменет Ристо Симеонов, а на негово место е назначен Лазар Тодоровиќ. Дознаваме дека оставка на директорското место на Клиниката за рентгенологија и радиологија си дала Елизабета Стојовска, а на нејзино место се уште нема назначено нов директор. НОВА ја праша Копачева Барсова дали добила образложение зошто е сменета, но таа не знаеше зошто е сменета.
„ Не знам зошто сум сменета, а сакам да знам. Решението го добив во 14 часот и 15 минути без никакво образложение“, одговори кратко Копачева Барсова.
Таа вели дека за овие шест месеци додека ја извршуваше директорската функција успеала да го намали долгот од 17 на 7 милиони денари, а внесени се 200 000 евра инвестиции за опрема и 100 000 евра за реконструкција на клиниката. Токму заради тој факт е изненадена и не знае која е причината за нејзината смена.
Министерот за здравство Венко Филипче ја потврди информацијата за смените на директорите на овие две клиники. На го коментираше конкретно ниту едно разрешување. Само кратко рече дека им истекува мандатот и дека треба освежување во здравството.
„ Потребно беше освежување, а на овие вд. директори им истече мандатот деновиве“, изјави министерот Филипче за НОВА.
Тој нагласи дека нема да има други кадровски смени освен на клиниките каде што имало директори од Алијансата на Албанците. Тоа се клиниките за очни болести, кардиологија и стоматологија каде што се уште не се назначени нови директори.