Жената која нејзиниот гинеколог цели девет месеци ја манипулирал и лажел дека е бремена, не е единствена. Веднаш по објавувањето на сторијата на НОВА, во редакцијата се јавија десетина жени кои раскажаа слични искуства со гинекологот против кој е поднесена тужба. Некои од нив застанаа со име и презиме зад своите изјави, други сакаа да бидат објавени со нивните иницијали.
Своето искуство со гинекологот го сподели Л.К од Скопје. Таа вели дека штом го видела текстот на НОВА знаела за кој лекар се работи.
„Истото ми се случи и мене со гинекологот Никола Дамчевски додека работеше во една приватна болница. И мене ми соопшти дека сум бремена, иако бев сигурна дека не сум бидејќи пред да ми направи ЕХО направив тест за бременост. Знаејќи колку желно чекаме бебе, излезе во ходникот и гордо му соопшти на мојот сопруг дека ќе стане татко, дури го викна да го види бебето на ЕХО. Мојот сопруг полета од радост, а јас пред лекарот му реков да не се радува непотребно бидејќи јас знам дека не сум бремена.
Му реков на гинекологот дека ме боли стомакот бидејќи очекувам месечен циклус. Тој ме убедуваше дека стомакот ме боли заради тоа што сум бремена. Јас му се јавив утредента да му кажам дека добив месечен циклус, а лекарот упорно ме убедуваше да ми направи Ин витро, тој лично. Јас повеќе не сакав да го видам. Да си играш со нечии чувства е многу болно“, раскажа Л.К. од Скопје.
Друга пациентка, Билјана Крстевска, се чуди како гинекологот се уште работи и тоа во јавно здравство бидејќи, како што вели, многу пати бил пријавуван:
„Јас имам многу лошо искуство со гинекологот. Заради него за малку ќе ја изгубев шансата да се реализирам како мајка. Ми даваше терапија која не сум смеела да ја примам, а воопшто не ми кажа дека имам тумор на матка. Се ова за малку ќе ме чинеше живот. На Клиника за гинекологија ме оперираа и одвај ме спасија. Се е во парите “, изјави Крстевска на НОВА.
Таа вели дека особено подложни на манипулација се жените кои се борат со стерилитет, се обидуваат да забременат со Ин витро, а во тие моменти за нив лекарот е господ. Да лажеш жена која очајнички сака да стане мајка е ужас, вели И.Н од еден град во внатрешноста.
„Мене истиот овој гинеколог ме лажеше дека ми прави Ин витро на природен циклус. Ми направи лажен трансфер и ме остави да лежам во сала повеќе од еден час иако имав платено болничка соба.
За тоа време отишол во болничката соба каде што ме чекаше сопругот и му побарал веднаш да плати, но рекол дека не може да му даде фискална сметка бидејќи не му работи фискалната каса. Сопругот му дал 40 000 денари на рака. Лежев дома две недели во надеж дека ќе успеам да забременам.
Во меѓувреме, гинекологот ми рече проверка да направиме во мојот град и веќе не го видовме, не одговараше на телефон. Освен фискалната сметка за пункција, друг доказ немам инаку и јас ќе го тужев“, изјави И. Н. за НОВА.
Една од жените која сакаше да остане анонимна, за НОВА раскажа слична сторија- дека исто така поднела пријава против гинекологот, но ја повлекла од обвинителство бидејќи не сакала да се потсетува на тоа како била изманипулирана и низ какви трауми поминале со сопругот. Случајот е ист како кај нашата соговорничка која имаше храброст да ја раскаже својата приказна иако анонимно, но со докази и медицински документи.
Како започна откривањето на случајот со гинекологот
Се почна од вчерашното сведоштво на пациентка која ни изјави дека цели девет месеци била лажена и манипулирана од гинекологот кој и давал хормонална терапија од која и растел стомакот. За време на лажната бременост, докторот правел гинеколошки прегледи, и го мерел грлото на матката, ја убедувал дека е бремена, ја терал да прима непотребни лекарства и терапии и правел гинеколошки скрининзи за детално да се прегледа плодот.
На секој преглед и давал ехо снимки на кои се гледа плод, кои претходно ги имал претходно подготвено да и ги даде, и давал хормонална терапија за вештачки да се покажат параметри кои ќе ја убедат дека е бремена, и кажал дека носи машко дете и вршел детални прегледи каде во детали го опишувал плодот.
„Секоја недела одев на ЕХО преглед, а тој упорно ме убедуваше дека сум бремена. Цели девет месеци ми даваше хормонална терапија од која ми се зголеми стомакот, а од непотребните лекови и инјекциите против коагулација на крвта цело време крварев.
Лекарот на секој преглед ме убедуваше дека тоа е нормално и дека со бебето е се во ред. Ми покажуваше слики од бебе направени на ЕХО, ми пушташе да му ги слушам отчукувањата на срцето, а подоцна ми призна дека всушност ми пуштал да го слушам сопственото пулсирање на срцето. Ги мереше димензиите на бебето, неговата должина, должината на бутната коска, главата, “, изјави за НОВА, оваа четириесет годишна жена.
Таа поднесе кривична пријава против гинекологот и против него во обвинителство се води истрага за следните кривични дела: Тешки дела против здравјето на луѓето, Измама и Фалсификување на исправа. Со честите вагинални прегледи таа вели дека била и сексуално вознемирувана.
За да се извлече од сето ова, гинекологот планирал да и направи царски рез или киретажа со целосна анестезија и да и каже дека бебето било мртво. Тоа му го кажал на сопругот кога му соопштил дека“ кога мислеле дека е бремена, неговата сопруга воопшто не била бремена“. Тој не дозволил такво нешто и лекарот морал да и ја соопшти вистината на жената која чекала подготвена за породување.
Надлежните институции не презеле ништо, на потег е тужба за гинекологот
Еден ден по ова, на 7 ми април минатата година, сопружниците за случајот писмено ја известиле Лекарската комора, а подоцна и Министерството за здравство. Лекарската комора иако за случајот знаеле цела година не превземале ништо, од како што велат, технички причини.
„Во Лекарската комора на Македонија е поднесена претставка за предметот, а активностите околу спроведувањето на стручниот надзор над стручната работа на докторот се во постапка. Во повеќе наврати направени се обиди за реализација на надзорот, но од објективни причини тој досега не се реализира“, се вели во одговорот на Лекарската комора.
Марија Хаџи Лега, директорка на Гинекологија
Директорката на Клиниката за гинекологија каде што од септември минатата година е вработен гинекологот, Марија Хаџи Лега се уште не се изјаснила за случајот.
Гинекологот Дамчевски вчера изјави дека кажал се што имал во обвинителство и дека не сака да разговара се додека не заврши постапката.
„Тоа што сум го направил сум го кажал таму каде што треба. Тврдам дека не сум загрозил ничиј живот, не дошло до губење на органи, не сум убил човек, не сум направил ништо лошо што ќе донесе непријатности понатаму во животот“, изјави Дамчевски за НОВА.
Тој потенцира дека досега не бил осудуван, дека не наштетил на ниту една пациентка, а вакви работи постојат за пациентки да се извлечат од дадена состојба. Не сакаше да каже дали тој имал други вакви случаи.
Ирена Фрчкоска, адвокатка
Освен тоа, сопружниците ангажирале адвокат, а за случајот ги известиле Министерството за здравство и Лекарската комора. Нејзината адвокатка Ирена Фрчковска за НОВА изјави дека лекарот мора кривично да одговара и да му биде забрането да ја врши дејноста за да не наштети и на други пациентки.
„Овој лекар нема морален основ да врши лекарска дејност и треба кривично да се казни. Имаме граѓанска и социјална обврска да ја известиме јавноста, со цел да превенираме во иднина да не повтори вакво монструозно и нехумано дејствие на друга жена. Тој не смее да биде заштитен со вработување во државна Клиника за гинекологија, туку неговото кривично дело треба да и биде познато на целата јавност“, изјави за НОВА Фрчковска, адвокатка на оштетената.