Сите досегашни материјали прибавени со незаконско прислушување кои укажуваат за сериозни криминали и злоупотреба на функциите ќе може да се реемитуваат.
Она што е новина во Законот за заштита на приватноста или популарно наречен закон за „бомби“ се санкциите доколку се наруши приватноста на граѓаните.
Секој кој користел уред за неовластено да прислушува ќе добие затворска казна од една година, оној кој ќе го овозможи прислушкувањето ќе добие затвор од 1 до 5 години, а правното лице кое тоа ќе го објави ќе добие парична казна согласно Законот за прекршоци.
Со новиот Закон, кој по долги преговори синоќа партиите едногласно го договорија се гарантира заштита на приватноста на граѓаните согласно со Уставот и Европската конвенција за човекови права, велат од опозицијата.
Според договореното, нема да има санкции врз новинарите или уредниците, туку директно врз фирмата која ќе загрози нечија приватност, а со 10 отсто од профитот ќе бие казнет и операторот кој ќе овозможи прислушкување.
Во законот не влегуваат материјалите кои имаат индиција или директно укажуваат на кривично дело и се од јавен интерес и ќе се однесува на прислушувањето спроведено меѓу 2008-2015 година.
Како што брифираат од опозицијата, законското решение опфаќа почитување и заштита на личниот и семеен живот, политичката, религиозната и етничка припадност, како и здравствената состојба на секој граѓанин.
Тој ќе стапи на сила 6 месеци од денот на однесувањето, што значи дека опозицијата ќе има можност дел од објавените бомби да ги користи и во предизборната кампања.
Претходно, во врска со Законот ќе се произнесе и Венецијанската Комисија, а обврска на политичките партии ќе биде по добиеното мислење во рок од пет дена да ги усогласат сите забелешки на Комисијата.
Доколку законот се прекрши, надлежен за постапување е судот, кој треба да ги има в предвид Европската конвенција за човекови права.
Медиумите нема да бидат донатори на партии
Согласно вчера договореното се забранува медиумите или лица поврзани со нив да се јавуваат како донатори на одредена политичка партија.
Комерцијалните телевизии имаат обврска да отстапат 8 минути простор за платено политичко рекламирање на власта и опозицијата и по една минута за помалите партии.
Измените во Изборниот законик опфаќаат и половина од билбордите да се отстапат на политичките партии во предизборна кампања и тоа 40 отсто од нив за власта и опозицијата и по 10 отсто за помалите или нови партиии.
Иако за јавниот сервис преговорите се уште се во тек, досега е договорено МРТВ да има обврска да организира дебати меѓу власта и опозицијата во предизборието.
Освен за медиумите, во делот на финансирањето на партиите договорени се измени и за останатите донатори. Фирмите кои досеаг имаа можност да донираат по 50 000 евра на партиите, сега се ограничени на 30 000 евра, додека поединци, наместо 5 000 отсега ќе имаат законско право да донираат по 3 000 евра.
Партиите се обрзани по завршување на кампањата веднаш да прикажат прецизни извештаи за донациите, а доколку посоти сомнеж за приливот на парите надлежна за покренување постапка е Државната изборна комисија.