Во Централниот регистар вчера беа впишани две нови здруженија „Национален фронт“- Прилеп и фондацијата „Македонско наследство Тодор Александров“.
Овластено лице на прилепското здружение е Јане Ченто, а на фондацијата е Дијана Транталовска. Освен Транталовска, која е член на ВМРО-ДПМНЕ, еден од сопствениците е и Виолета Ачкоска.
Универзитетската професорка Виолета Ачкоска е една од првотимците на неформалното здружение ГДОМ, секогаш во прв ред кога треба да се бранат ставовите на ВМРО-ДПМНЕ, а сега стана сопственик на фондацијата „Македонско наследство Тодор Александров“.
Ачкоска за НОВАТВ вели: „Доста беше само од здруженија финансирани од СОРОС, кои ни ја растураат државата. Потребни се македонски здруженија кои ќе работат на афирмација и заштита на името, традицијата и историјата на Македонија. ГДОМ е неформално здружение, новата црврно-жолта иницијатива исто така. Затоа решивме да формираме едно официјално здружение кое ќе делува и работи на македонската линија“.
Јане Ченто или Војводата од Прилеп како што себе си се нарекува на неговиот фејсбук профил е правнук на Методија Андонов – Ченто и во првите редови на протестите на „Иницијативата за заедничка Македонија“.
Тој исто така е претседател и на Македонското патриотско здружение „Пере Тошев“, кое се уште официјално не е регистрирано во Централниот регистар, но веќе има активности, трибини и говори на протестите во Прилеп.
НОВА ТВ побара од Ченто информација која ќе биде целта на здружението, но досега од него не добивме одговор.
Во официјалните документи во Централниот регистар пишува дека целите и задачите на Здружението „Национален фронт“ е „заштита на унитарноста и името на Република Македонија , афирмација на личности занемарени од комунистичкиот режим, давање целосен континуитет на македонската историја од античко време, на македонската историја во време на ВМРО како организација и на македонската историја во времето на АСНОМ…и други цели за промовирање на македонската историја“.
Статутите на сите овие здруженија речиси се идентични од збор до збор. Напливот на вакви патриотски здруженија го најави лидерот на ВМРО-ДПМНЕ, Никола Груевски, во својот говор пред ДИК во ноќта на „долгите ножеви“.
https://www.youtube.com/watch?v=eHAp879wYUU
„Ќе се бориме за десороизација на Република Македонија и јакнење на независен граѓански сектор кој нема да биде под ничија контрола. Ќе се пристапи кон регулирање на областа на финансирање на фондациите и невладините организации по теркот на најнапредните демократии во светот“, рече Груевски
Македонско патриотско друштво „Андон Лазов Јанев Ќосето“ се формираше во Велес, а Патриотско здружение си има и Битола „Тодор Александров“.
Името на Тодор Александров се почесто се користи во реториката на вмровските следбеници и институции, но и во називите на новоформираните здруженија. Едно од најстарите кое го носи името на контроверзниот Александров е институтот „Тодор Александров“, формиран во 2010 година.
НОВАТВ се обиде да го најде седиштето на овој институт, но адресата „Анастас Митрев“ број 6 во скопската населба Мичурин не постои. Ни физички на улицата, ниту пак во адресарот на Телеком.
ВМРО-ДПМНЕ уште кога се појави демантираше било каква поврзаност со овој институт.
И додека како печурки никнуваат нови здруженија под плашт на патриотизам, истовремено под истрага на Финансиската полиција и УЈП се 30-тина граѓански организации во кои се проверува нивното финансиско работење и трансакции од агенцијата за меѓународен развој на САД, USAID. Невладините велат дека ова е атак врз нивната работа и ако не се стави крај на политичката криза, граѓанскиот сектор ќе биде колатерална штета.