Од:

Почнува фестивалот на народни инструменти и песни „Пеце Атанасовски“

На камената сцена на плоштадот „Александрија“ во Прилеп со сценско музичкиот перформанс „Традицијата оживува“ беше  отворен 43-от фестивал на народни инструменти и песни „Пеце Атанасовски“.

Уметничкиот перформанс  претстави ревија на женски носии од Полошкиот регион од крајог на 19-от и почетокотна 20 –от век, а преку песни и обичаи ја прикажа статусната улога на жената од овој крај. Автор на ова несекојдневно доживување е студентот Бојан Петковски.

Денес (сабота) и утре, в недела, се двата натпреварувачки дена. На Рудина кај Долнени, која  за прв пат доби амфитеатар.ќе настапат околу 350 изведувачи на народни инструменти и песни.

Програмата вo сабота ( 8 јули) почнува од 18.30 часот.

Фестивалот на народни инструменти и песни „Пеце Атанасовски“ се одржува под покровителство на Министерството за култура,  со поддршка на општините Прилеп и Долнени.

Пеце Атанасовски е една од клучните личности во македонската култура, преку фолклорот, по Втората светска војна. Од 1959 година до пензионирањето, тој бил раководител на Оркестарот од народни инструменти во Радио Скопје и кореограф на повеќе од дваесет културно-уметнички друштва во Македонија.

Од 1966  година, во текот на следните 29 години, ја раководел Фолклорната школа за странци во Отешево. Во 1973 година го основал и бил директор на Долненскиот фестивал, кој по неговата смрт бил именуван како Фестивал на народни инструменти и песни „Пеце Атанасовски”.

Со своите гостувања со разни културно-уметнички друштва низ светот ги афирмирал високите достоинства на македонскиот мелос. Атанасовски бил носител на 19 меѓународни награди на светските фестивали во Ланголен (Англија), во Брно, итн.

Во конкуренција на 1 800 гајдаџии од целиот свет, тој го освоил првото место и наградата „Златна гајда” на фестивалот во Ериче, Италија  во 1988 година. Како светски признат народен инструменталист, држел часови на разни универзитети во светот, од Анџелес до Токио. Во текот на својата кариера, Атанасовски собрал импозантна фолклорна збирка од околу 20 000 народни песни и ора.