НОВА дознава дека Народниот правобранител има сознанија дека нешто „шкрипи“ во Законот за лекови во делот на паралелниот увоз, поради што побарале од Владата да се подигне нивото на безбедност на граѓаните и итно да се донесат измените на Законот за лекови
Народниот правобранител денеска упатил писмо до Владата со кое бара да се зајакне системот на безбедност на граѓаните и што побргу да се смени Законот за лекови во делот на паралелниот увоз, дознава НОВА од свои извори.
Откако НОВА го објави истражувањето за паралелниот увоз на лекови каде се отвори сомнеж дека 40 проценти од лековите што доаѓаат на ваков начин се фалсификат, Народниот правобранител веднаш започна истрага. На барање на Народниот правобранител, Министерството за здравство побарало од сите болници во државата да достават итна информација за набавка на лекови во 2016 и 2017 по основ на паралелен увоз, но и интервентен увоз. Од документот до кој дојде НОВА, се гледа дека болниците побарале од веледрогериите да им достават список на лекови кои им ги имаат испорачано, за која цена и за колкава количина се работи. Овие информации требало да бидат доставени до 10 овој месец.
Неофицијално, истрагата што ја потегна Народниот парвобранител уште трае, податоците се обработуваат бидејќи се работи за комплицирана и опсежна анализа.
НОВА од свои извори дознава дека Народниот правобранител има сознанија дека нешто „шкрипи“ во Законот за лекови поради што денеска побарале од Владата да се подигне нивото на безбедност на граѓаните и итно да се донесат измените на Законот за лекови.
Народниот правобранител, очигледно од сите институции во државата најсериозно се зафати за проблемот со паралелниот увоз кој овозможува легално во државата да влегуваат сомнителни или фалсификувани лекови од Турција.
Фондот за здравство се уште не се изјаснил дали и што превземал за овој сериозен проблем, дали била направена анализа за паралелниот увоз на лекови, кои и колку лекови се внесени во државата, колку се уништени, дали реално на ваков начин била намалена цената на лекови, има ли бенефит државата од тоа.
НОВА во изминатите три месеци во континуитет објавува дека во државата преку паралелен увоз на лекови во последните пет години влегуваат сомнителни лекови за кои не се знае како се транспортирани и чувани, немаат сертификат директно од производителите, туку се внесуваат од трети земји преку разни канали и веледрогерии.
Пред две недели и Народниот правобранител се заинтересира за случајот со паралелниот увоз со лекови за кој пишуваше НОВА и од таму потврдија дека се обратиле до Агенцијата за лекови(МАЛМЕД) при што побарале информации за потеклото на овие лекови, од каде доаѓаат, како влегуваат, како се транспортираат и чуваат.
Сомнеж дека 40 проценти од лековите кои влегуваат преку паралелен увоз првично изразија од Фармабренд Нова, асоцијација на претставници на странски производители на иновативни лекови.
Таму потврдија дека имаат сознанија за повеќе случаи каде што биле пријавени нерегуларности кај лекови од паралелниот увоз забележани од пациенти, лекари и аптеки, но претходното раководство во Агенцијата за лекови не превземало никакви мерки за заштита на пациентите.
НОВА веќе објави дека се откриени случаи кога во пакување од еден лек има сосема друг лек со поинаков начин на дејство што го доведува во опасност животот на пациентот доколку не ја забележи грешката.
Имало случаи каде амбалажата на лековите била комплетно изгужвана и искината, а при проверка на лекот преку фармацевти од Турција било утврдено дека лековите се поврзани со имиња на турски пациенти и дека веќе биле наплатени во Фондот за здравство во Турција.
Шокантно е дека пред две години на тендер од Министерството за здравство, добил лек од паралелниот увоз произведен во Турција кој е забранет за употреба во многу земји во светот поради 40 евидентирани смртни слуачи. Лекот се користи за лекување на неколку видови на рак и бил наменет за болните од Клиниката за онкологија.
Паралелниот увоз на лекови го воведе претходната Влада во 2012 година со образложение дека на ваков начин ќе ја намали цената на лековите. Но, наместо од земји од ЕУ каде што има строги закони и критериуми за паралелен увоз, евтините лекови во Македонија најчесто се увезуваат од Турција или Русија.
Експертската јавност сега бара измени на законот за лекови во делот на паралелниот увоз со лекови со што ќе се гарантира сигурноста на лековите и безбедноста на граѓаните.