Полицијата привела пет лица од вкупо 15 кои ги бара Jавното обвинителство во врска со упадот и насилството во Собранието, соопшти МВР.
Еден од нив е началник во Управата за безбедност и контраразузнавање. Останатите по кои се трага засега се недостапни за полицијата.
Сите 15 лица по кои од синоќа трага МВР се дел од групата која упадна во прес центарот на Собранието и ги тепаше пратениците.
Ова следува по наредбата од ОЈО за приведување на 15 учесници во насилствата врз пратениците и МВР постапува по тоа барање.
Претходно МВР испрати писмо до Основното јавно обвинителство со кое бара под итно да се повикаат на сослушување и да им се одредат мерки за обезбедување на четири лица за кои се обезбедени докази дека биле организатори и водачи на насилството врз пратениците кое се случи во четвртокот во Парламентот.
Во Собранието извршен е увид како и кримтехничка обработка на местото на настанот за што се изготвени записници. Од страна на Основно јавно обвинителство Скопје, издадени се Барања за доставување податоци од повеќе електронски медиуми, ЈП УЛИЦИ И ПАТИШТА, МВР на РМ УБК ООТПО како и наредби за вештачење до МВР на РМ – ОКТИВ кои откако ќе бидат изготвени дополнително ќе биде поднесен соодветен службен материјал.