Скопје 2014 ќе престане да се гради и проектот ќе биде подложен на ревизија, рече Петре Шилегов одговарајќи на прашањето на Борјан Јовановски во емисијата „Ноќно студио“.
-Во моментот е стопирана градбата, постојат неколку варијанти како да се продолжи понатаму, една од опциите е мост. Дел од техниката е пристигната во Скопје, дел е платена. Ќе мора многу внимателно да влеземе во сериозна анализа. Во реката Вардар недозволиво е да имаме ваков објект и тоа нема да се најде таму – рече Шилегов.
Петре Шилегов кој освои најмногу гласови од гласачите во Скопје, вели дека поранешниот градоначалник Коце Трајановски се уште не му се јавил да му честита за победата и дека тоа е одраз на политичка некултура.
-Јас кажав уште во време на кампањата, кога имав средба со архитекти, ниту една одлука нема да биде носена во канцеларијата на градоначалникот на градот Скопје. Секогаш во носењето на одлуката ќе биде вклучена и стручната јавност. Мојот став е ирелевантен и од оваа позиција ако го соопштам ќе влијае на општиот став. Ќе има интервенција по сугестија на стручната јавност. Ќе се потрудиме да најдеме оптимално решение за постојниот изглед на објектите – рече Шилегов , одговарајќи на прашањето што ќе се случува со проектот Скопје 2014, за кој постои огромен револт кај гласачите кои му ја дадоа својата доверба на Шилегов.
На прашањето, каков е неговиот план за во декември и како ќе покаже дека е поразличен од претходниот концепт на управување со градот, Шилегов одговори дека уште во ноември ќе се започне со чистење на Скопје, односно со миење на улиците, кои според него се запуштени и нечисти, полни со прав.
Шилегов се плаши дека доколку некои од скопските општини имаат градоначалнци од ВМРО ДПМНЕ, тие ќе бидат инаетливи и ќе се соочува со потешкотии при носењето мерки против загадувањето.
-Ќе го зголемиме инспекцискиот надзор кој ќе биде 24-часовен. Постојат, а не се лоцирани се уште, места и субјекти кои прават загадување на градот Скопје – рече Шилегов.
Тој најави дека во 2018 година ќе ја започне секундарната гасификација на градот Скопје, со која според него граѓаните ќе ги загреваат своите домови поевтино и еколошки поптифатливо.
– Јавниот градски превоз ќе биде бесплатен во најзагадените денови, а ќе има и сообраќајни рестрикции. Ќе се ревитализираат железничките станици. Станицата Скопје Север ќе стане главна градска железничка станица – најави Шилегов.
Сепак, според него, не можеме да очекуваме спектакли во првата сезона.