Филип Петровски вечерва при влезот во седиштето на ВМРО-ДПМНЕ одби да одговори на новинарските прашања и при влезот со раката ги оттурна микрофоните во негова близина.
Новинарите го прашуваа за шпекулациите во однос на евентуалниот договор за двојазичност помеѓу ВМРО-ДПМНЕ и ДУИ, како и дали е постигнат договор за нова коалиција.
За разлика од Петровски, Антонио Милошоски при пристигнувањето во партијата им се обрати на новинарите и даде кратка изјава пред камерите.
Според Милошоски, се уште не се донесени одлуки за евентуална коалиција и вечерва ќе се одлучуваат следните чекори.
„Вечерва ќе одлучиме што и како ќе правиме, не можам ништо да соопштам се додека не почне Извршниот комитет на ВМРО-ДПМНЕ и тогаш ќе се дискутираат сите опции“, рече Милошоски кој одбегна да ги коментира информациите кои се објавуваат во медиумите за преговорите и состанокот кој се одржува во ДУИ.
Во моментов во седиштето на ВМРО-ДПМНЕ пристигнуваат повеќе високи функционери за закажаниот состанок на Извршниот комитет на партијата.
Повеќе медиуми известија дека на состанокот ќе се соопшти дека ВМРО-ДПМНЕ и ДУИ се договориле за влада, но со оглед дека состанокот на претседателството на ДУИ се уште не е завршен и оттаму ги демантираа овие информации, засега е неизвесен исходот од преговорите.
Во медиумите се објавија шпекулации дека ВМРО-ДПМНЕ го прифатило барањето на ДУИ за двојазичност на цела територија на земјата, претседателското место во Собранието како и шест министерски места во новата влада.
Вечерва на полноќ истекува рокот за Никола Груевски да формира влада. Во последните денови се водат интензивни преговори од страна на ДУИ и со ДПМНЕ и со СДСМ, но јавноста имаше малку информации за деталите во преговорите.