Од:

ВИДЕО: Мијалков избега од новинарските прашања пред СЈО

Сашо Мијалков пристигна во СЈО со службен џип БМВ на МВР, кој му е даден заедно со членови на обезбедување, заради проценки дека постои опасност по неговата безбедност, дознава НОВА.

По цели два часа поминати во просторите на Специјалното јавно обвинителство, поранешниот шеф на УБК Сашо Мијалков си замина и ги избегна прашањата на новинарите.

Медиумите буквално го имаа опколено излезот од СЈО, во исчекување да излезе Мијалков и да даде коментар или изјава по распитот во СЈО.
Во придружба на партискиот адвокат на ВМРО-ДПМНЕ Никола Додeвски, Мијалков ја напушти зградата и ги одбегна новинарите кои тргнаа по него, поставувајќи му повеќе прашања на кои тој не одговори.

НОВА го праша дали се чувствува виновен за случаите кои СЈО ги покрена против него, но тој не застана да даде изјава или коментар на ниту едно од прашањата кои ги довикуваа новинарите.

Мијалков за прв пат се појавува во СЈО, овој пат за да даде исказ за случајот „Тортура“ кој ова Обвинителство го покрена во врска со апсењето на лидерот на Обединети за Македонија Љубе Бошковски, ден по изборите во 2011 година.

Освен Мијалков, кој е првоосомничен, во овој случај осомничени се и командантот на специјалната едниица Алфи, Ивица Антевски – Пуки и други припадници на оваа единица. Тие се товарат за нечовечко постапување и тортура при апсењето на Бошкоски. За ова кривично дело е предвидена затворска казна од една до пет години.

НОВА дознава дека џипот „БМВ“ со кој денеска пред СЈО пристигна Мијалков, е сопственост на МВР. Неофицијално, од извори во МВР, дознаваме дека тој освен возилото, од Министерството за внатрешни работи се уште има обезбедување бидејќи наводно постоеле проценки дека постојат опасности по неговата безбедност.

Екс директорот на УБК, Сашо Мијалков вчера се појави на распит во Кривичниот суд, како еден од осомничените за злоупотреба на државниот буџет при набавка на опрема за следење на комуникации, во случајот „Трезор“. Повеќе за ова читајте на следниот линк.