ВМРО-ДПМНЕ во соопштение до јавноста го повторува ставот на претседателот на партијата Никола Груевски искажан за време на интервју на телевизијата Сител.
Партија потенцира дека на Заев ќе му дала поддршка за малцинска влада само да не ја прифати платформата на албанските партии. Н ВМРО-ДПМНЕ потенцира дека победници на изборите сепак се тие.
– На 11 декември победија граѓаните на Република Македонија заедно со ВМРО-ДПМНЕ. Победи концептот на унитарна и мултикултурна Македонија. Време е СДСМ да се помири со поразот и да прекине со погубното сценарио за урнисување на нашата држава. Граѓаните на 11 декември не гласаа за официјализирање на албански јазик, двојазични банкноти, кантонизација или федерализација.
– Нека размислат и нека се откажат од антидржавното сценарио додека не е предоцна. Веднаш ќе ја добијат поддршката на ВМРО-ДПМНЕ за формирање Влада, но условот за нашата поддршка е да се откажат од редефинирањето на државата, двојазичноста, кантонизацијата и федерализацијата, како и бинационалниот концепт на Република Македонија…Подготвени сме да го поддржиме Заев во формирање Влада, ако и само ако се откаже од урнисувањето на државата и виткање на кичмата, се вели меѓу другото во соопштението на партијата.
Оттаму го обвинуваат Социјалдемократскиот сојуз за “виткање кичма“ во “болна желба за власт“ која се случувала и во минатото.
– Во 2004 година го донесоа Законот за територијална поделба за да се дограбат до функцијата Претседател, а граѓаните на Република Македонија, особено на Струга и Кичево и ден денес ги трпат последиците. И тогаш како и сега преку бројните платеници се обидуваа да го изманипулираат народот. Истото ни се случува и денес. Зоран Заев и СДСМ и денеска се подготвени за власт да ја прифатат и реализираат Платформата смислена во Тирана, констатира ВМРО-ДПМНЕ.