Првиот човек на СДСМ, Зоран Заев, во денешното обраќање на Конгресот на партијата, пред раководството и членовите порача дека по 11.декември, Македонија нема да ја слави победата на СДСМ, туку ќе го слави животот.
„Што ќе славиме на 11.декември? Пад на режимот? Тој е веќе паднат, ние граѓаните го турнавме. Победа на СДСМ и опозицијата? Нам не ни треба победа заради самата победа и хранење на егото, или заради власт. Драги граѓани на 11. Декември ќе го славиме животот“, порача Заев на почетокот од својот говор.
Пред присутните Заев ги потенцираше залагањата на неговата партија, односно дека на почетокот најниската плата ќе биде зголемена на 12.000 денари а планот е на истекот од мандатот таа да достигне до 16.000 денари. „Ме прашуваат луѓето од каде пари. Нема да се расфрламе на камења и палми“, рече Заев.
Меѓу другото, претставувајќи мерки од претстојната Програма на СДСМ, Заев порача дека тие ќе им помагаат на домашните бизнисмени, на малите и средните претпријатија, дека по освојување на власта, тие ќе ја подобреле инфраструктурата, ќе градат водоводи и патишта, бидејќи сегашната власт оставила, како што рече Заев, пустош.
„Се изнагледавме изминативе 10 години разни квазипатриоти за кои патриотизам е полнење на личните џебови и партија со над 60 милиони евра имот. Тоа е алчност а не патриотизам“, се осврна Заев на власта на Никола Груевски, и на граѓаните кои бараат помош од државата, рече дека вратите им се отворени низ штабовите на СДСМ, да бидат сослушани и да разговараат за проблеми и иднината на сите.