И од Алијансата за Албанците и од ДУИ сакаат да го добијат испразнетото министерското место за здравството. Преговорите меѓу коалиционите партнери кои најверојатно ќе се случат кон крајот на недела ќе покажат кој ќе го добие жешкиот костен
До крајот на неделата најверојатно ќе се знае кој ќе седне на испразнетата министерска фотелја во Министерството за здравство. Ова за НОВА го потврди премиерот Зоран Заев кој нагласи дека преговорите се одолжиле заради неговите службени патувања.
„Се уште немаме разговарано заради моите патувања. Но, верувам дека до крајот на оваа седмица ќе разговараме со коалиционите партнери“, изјави премиерот Заев за НОВА.
Претседателот на Алијансата за Албанците Зијадин Села вели дека чекаат повик од премерот за да седнат и да преговараат. Тој е дециден дека ќе го бараат министерското место и нема да прифатат промена во однос на првичниот договор.
„Јас не сум премиер за да можам да свикам на заедничка средба, таму кај него обратете се за одговор кога ќе се случи тоа. Ние нема да прифатиме никаква промена од она што е веќе договорено претходно’, изјави за НОВА, Зијадим Села, лидер на Алијансата за Албанците.
Во политичките, но и во здравствените кругови веќе се калкулира со неколку имиња, но нема потврда кој од нив е можниот наследник на Таравари. Очигледни се сериозните претензии од коалиционите партнери за оваа висока, но и исклучително тешка и одговорна функција. Од ДУИ не кријат дека имаат желба да го добијат ова атрактивно место.
„Ова е добро министерско место и ДУИ посакува да го добие. Но желбите се едно, а преговорите се друго, така што од исходот на преговорите ќе зависи кој ќе го добие. Во секој случај на ова место е потребен сериозен човек кој ги знае проблемите од внатре“, изјави за НОВА Илир Хасани, претседател на здравствениот совет на ДУИ.
Македонија се уште нема министер за здравство иако локалните избори се завршени пред една недела. Арбен Таравари минатата недела ја презеде градоначалничката функција, а во време на кампањата не можеше да ги извршува работните обврски иако доаѓаше во утринските часови на кратко во Министерството за здравство.
Извори од СДСМ пак, за НОВА велат дека албанските партии имаат предност за ова министерско место, но дека во игра е и СДСМ. Од таму посочуваат дека пресудно ќе биде парламентарното мнозинство, но и дека при одлучувањето Заев ќе знае каде и како да пресече.
Во ситуација кога ова важно место е празно, работите ги презема заменикот министер Гоце Чакаларовски. Сепак, тој не може да носи клучни одлуки, ниту да спроведува реформи. Поради тоа многу работи во ова министерство се закочени и не може да функционираат.
Во здравствените кругови веќе се коментира дека е изгубено драгоцено време во делот на реформите во здравството и тоа од доаѓањето на Таравари за министер до сега бидејќи, како што велат, никакви системски поместувања немаше. Многу време се изгуби и на кадровските смени од вториот и третиот ешалон, кои најверојатно ќе претрпат измени и со доаѓањето на новиот министер за здравство, велат познавачите на проблематиката.