Под мотото „БЛЕСОК – за сите нас!“, на 12 март (среда) од 20:30 до полноќ, во МКЦ Клуб ресторан, КУ Блесок ќе одбележи шеснаесет години од првиот број на е-списанието „Блесок – литература и други уметности“ – првото и најстаро европско интернет списание за култура и уметност. Првиот број на „Блесок – литература и други уметности“ излезе на 12 март 1998 г.
Во чест на овие шеснаесет години, во кои објавивме илјадници песни, раскази, извадоци од романи, драми, есеи, критики и осврти, слики, музики, видеа… – дојде момент пак да се сретнеме, со насмевка – велат од Блесок.
Со свои текстови ќе настапат некои од авторите чии книги „Блесок“ ги објавил во изминатите 16 години: Елизабета Баковска, Румена Бужаровска, Џабир Дерала, Александра Димитрова, Богомил Ѓузел, Јовица Ивановски, Тихомир Јанчовски, Јелена Лужина, Оливера Николова, Михаил Ренџов, Благица Секулоска, Катица Ќулавкова.
На видео бим, со свои дела ќе бидат преставени голем број ликовни уметници.
За музиката ќе бидат одговорни Maria Jazz Trio – Марија Димитријевиќ (вокал), Дејв Вилсон (саксофон) и Јовица Јовановски (гитара).
е-списанието „Блесок – литература и други уметности“ излегува на секои два месеци, на македонски и англиски, а го уредуваат домашен уреднички тим и меѓународен уредувачки одбор. Новиот, 94-ти број, беше објавен деновиве.