– Ја вративме државата на патот на евроинтеграциите. Без да калкулираме со лични и со тесно-партиски интереси, го решивме спорот со Грција. Државата стана членка на НАТО“, истакна премиерот и лидер на СДСМ, Зоран Заев на онлајн прослава за јубилејниот 30.конгрес на СДСМ на кој меѓу другото истакна дека по 11 години во опозиција, од 2006 до 2017 година, социјалдемократите го одбележуваат тридеценискиот јубилеј како владејачка партија.
Заев најави и дека промените ќе продолжат и на конгресот во мај, оценувајќи дека партијата што тој ја предводи е државотворна и дека покажала највисок степен на одговорност во клучни моменти за земјата.
Во своето обраќање, Заев се осврна на, како што рече, рушењето на режимот, потсетувајќи на Шарената револуција и на настаните во парламентот на 27 април 2017 година, по што СДСМ дојде на власт.
– Убедливо победивме на локалните избори во 2017 година. На референдумот во септември 2018 година над 600 илјади граѓани гласаа за продолжување евроатлантската интеграција на државата. Во 2019 година, 29 партии застанаа зад изборот на Стево Пендаровски за претседател на државата. Победивме и на парламентарните избори во 2020 година. СДСМ победува, но и постојано се менува, затоа што статус кво е непријател на прогресот. Ги следиме новите трендови на работа и сме прва партија во државата која организираше непосредни внатрепартиски избори. Промените ќе продолжат и со конгресот што ни претстои. Со нова енергија и нови политики продолжуваме напред, со одговорност државотворност, храброст и посветеност“, истакна Заев.
Од партиското седиште, освен Заев, зборуваше и заменик-претседателката на СДСМ Радмила Шекеринска која рече дека изминатите години покажале што значи да се биде одговорна партија, која ги решава проблемите.