Кијив: Украина ѝ предаде на Литванија еден руски војник кого го заробиле нејзините вооружени сили за да му се суди за воени злосторства, соопшти денеска украинското обвинителство.
– За прв пат од почетокот на големата агресија, Украина предаде руски војник на странска држава, Литванија, заради гонење за воени злосторства, напиша украинскиот главен обвинител Руслан Кравченко на социјалните мрежи, нарекувајќи го тоа „историско за правдата“.
Ова е јасна порака до сите воени злосторници: Нема да можете да избегнете правда во ниту една земја на слободниот свет. Правдата ќе биде задоволена, истакна тој.
Овој високорангиран руски поморски офицер е обвинет за „незаконско притворање, мачење и нехумано постапување со цивили и воени заробеници“, вклучително и еден државјанин на Литванија, рече обвинителот.
Тој детално опиша „тепања, мачење со струја, гушење и затворање луѓе во метални сандаци“.
Литванското обвинителство го обвинува него, заедно со другите припадници на неговата единица, дека организирал „камп“ во украинскиот град Мелитопол, кој Москва го окупира од првите денови на инвазијата на Украина во 2022 година.
Во тој камп „цивили и воени заробеници, вклучително и еден државјанин на Република Литванија, биле незаконски притворани, мачени и понижувани“, наведе обвинителството на Литванија.
Осомничениот бил заробен од украинските сили во август 2023 година во областа Запорожје на југот на Украина, во близина на селото Роботине, се наведува во соопштението.
Според обвинителството во Вилнус, осомничениот бил префрлен во Литванија во вторникот, а во четвртокот бил ставен во притвор на три месеци, а во Литванија, тој е обвинет за „воени злосторства, мачење, незаконско лишување од слобода и кршење на Женевските конвенции“ и се соочува со доживотен затвор.