Должник на фирмата која го градела објектот е Министерството за здравство. Два месеца тешко болните од Психијатриската болница во Бардовци чекаат министерот Филипче да го потпише документот и да се вселат во новиот објект
Околу 80 пациенти од Психијатриската болницата во Бардовци не можат да се вселат во новиот објект иако е завршен пред два месеца. Станува збор за тешки душевни болни пациенти од четврто и петто машко одделение кои остануваат во болницата до крајот на животот. Овие пациенти седум години се раселени по другите објекти каде што престојуваат во услови под секое човечко достоинство, во соби пренатрупани со пациенти.
Причината зошто не е пуштен во употреба новиот објект е што Министерството за здравство не исплатило уште 400 000 евра на фирмата која ја реновирала зградата. Од претставништвото на изведувачот “Ингра“ АД од Загреб велат дека со екс министерот Таравари потпишале договор за да се откажат од тужбата и каматата од 100 000 евра откако претходниот долг од 900 000 евра им беше исплатен.
Но, и покрај ова министерот Филипче се уште не го потпишува документот со за да има се исплати последната сума.
„Парите од Банката на советот на Европа веќе се стигнати на сметката на Проектната единица на Министерството за здравство но, се уште не можеме да ги добиеме. Во ваква ситуација мораме да ја активираме тужбата повторно и да бараме да си ја наплатиме каматата од 100 000 евра“, изјави за НОВА, Делчо Арсовски од фирмата која ја застапува “Ингра“ АД од Загреб.
НОВА го праша министерот за здравство Венко Филипче зошто документот за исплата се уште стои непотпишан во неговиот кабинет.
„ Ќе се реши овој проблем, ќе го реализираме деновиве, се прават некои проверки“, кратко одговори министерот Филипче.
Како што објави НОВА во јули минатата година, цели седум години овие тешко болни се раселени од зградата каде што престојувале со години бидејќи Министерството за здравство, во време на екс министерот Тодоров одбило да и плати на истата фирма која вршела реконструкција на објектот. По ова фирмата поднесе тужба против Министерството за да им се исплатат ратите што им ги должеше ресорното министерство.
Откако НОВА ја објави сторијата Министерството за здравство одлучи да го исплати долгот, а фирмата се обврза во рок од три месеца да го пушти објектот во употреба и ја повлече тужбата со која бараше да им биде исплатена камата.
Изградбата на овој објект се развлече седум години поради незаинтересираност на поранешното раководство во Министерството за здравство кое не ги плаќало сметките кон изведувачот “Ингра“ АД од Загреб.
Сега кога целиот процес со реконструкцијата е завршен пациентите повторно не можат да се вселат внатре заради нерасчистени сметки меѓу Министерството за здравство и фирмата изведувач.