Шефовите на ЕУ дипломатиите денес ги ставија Балканот и Македонија на дневен ред.
По посетата на високата претставничка на ЕУ за надворешна политика и безбедност Федерика Могерини во Скопје пред неколку дена, таа денес ќе им поднесе извештај на министрите за ситуацијата на Балканот.
– Ќе ги известам денеска министрите, а подоцна во текот на неделата и премиерите за ситуацијата која е полна со тензии и којашто е изложена на внатрешни, регионални, но и глобални предизвици. Но тоа е регион кој има капацитет и сила да реагира и да запре такво нешто под услов да постои веродостоен евроинтеграциски процес, а тоа е дел од нашата работа. Од Советот на министри, но и лидерот на ЕУ очекувам да изразат јасна и силна поддршка за Западен Балкан со цел кредибилни евроинтеграциски перспективи“, изјави шефицата на ЕУ дипломатијата пред состанокот на Советот на министри со кој претседава таа.
ЕУ одлучи да му обрне повеќе внимание на Балканот откако во повеќе земји од нашиот регион се појави политичка тензија која може да доведе до нестабилност. Препукувањата помеѓу Белград и Приштина и состојбата во Босна и Херцеговина но и настаните во Македонија запалија црвено светло во ЕУ па дене се очекува да бидат усвоени заклучоци и да бидат испратени остри пораки до сите балкански земји.
Во соопштението на Советот на ЕУ во пресрет на министерскиот состанок се наведува дека „Западен Балкан има јасна европска перспектива, која е основа за стабилноста, помирувањето и иднината на регионот“.
– Се очекува министрите да го потврдат ангажманот и фокусот на ЕУ кога е во прашање регионот, вклучувјаќи го и одржувањето на политичките и економски врски со него. Од тој аспект од клучно значење е развојот на регионалната соработка и добрососедските односи, се додава во соопштението.
Според извори во Брисел, се очекува во заклучоците од министерската средба да се нагласи неопходноста од продолжување на реформските процеси во регионот со цел да се обезбеди „непречено напредување на партнерите од Западен Балкан на европскиот пат“.