И по две години од смртта на Мартин Нешковски и низата протести кои следеа подоцна стопирање на полициското насилство, институциите не понесоа никаква одговорност за прикривањето на убиството и сопствената вмешаност во него, револтирани се активистите кои и денеска излегоа на миран протест за да ја одбележат годишнината од немилиот настан.
Две години подоцна, посочуваат од „Движењето против полициската бруталност“, само директниот извршител ја понесе одговорност.
„Многу барања не се исполнети, судот не побара командна одговорност,подоцна ја одби и приватната тужба на семејството Нешковски. Затоа ние како здружение, заедно со Хелсиншкиот комитет решивме да поднесеме тужба во Стразбур, која ќе ја бара понатаму правдата“, изјави Тамара Атанасовска.
Правда за Мартин, но и за сите граѓани побара и неговиот брат Александар Нешковски:
„Институции пробаа да не замолкнат, замолкнаа и медиуми, заплашија и народ, но правдата мора да излезе на виделина за сите нас“.
„Две години по настанот, Мартин Нешковски кој беше жртва на бруталниот полициски систем,посочуваат активистите, стана симбол на правдата и борбата против полициската бруталност. Веднаш по немилиот настан, граѓаните се организираа и 40 дена секој ден се протестираше низ скопските улици. Ова беше и првото граѓанско движење последниве децении кое се роди како знак на револт против неодговорното однесување на институциите.
– За да не се заборави, но и никогаш да не се повтори“,семејството Нешковски, Движењето против полициската бруталност и Здружението Плоштад Слобода најавија дека ќе поднесат барање до општина Центар за поставување спомен обележје на местото каде што Мартин Нешковски беше свирепо убиен од припадник на полицијата.
Автор: Јасмина Јакимова