Додека шестмината балкански премиери се на пат за Брисел, шефицата на ЕУ дипломатијата Федерика Могерини испрати порака до нив за да им каже дека со нив ќе разговара за иднината на сорабоката помеѓу регионот и ЕУ.
Могерини ги покани на неформална вечера нашиот мандатар Зоран Заев и премиерите на Србија Александар Вучиќ, на Црна Гора Душко Марковиќ, на Албанија Еди Рама, на Косово Иса Мустафа и на Босна и Херцеговина Дениз Звиздиќ.
“Ги видовме последните настани, некои тешкотии но и некои добри чекори па оттука добро е да се сретнеме и да споделиме мислења, сите заедно, за чекорите што треба да се направат во иднина. Верувам дека ова е одлична можност за градење подобро регионално разбирање “, изјави Могерини денес.
ЕУ се загрижена поради порастот на националистичкиот говор на Балканот, особено кога тој доаѓа од високи политичари. Па така една главните причини за оваа покана е како балканските лидери да најдат начин и да научат дека не треба да разменуваат националистички пораки.
“Во последните настани имаше некои тешкотии но и некои добри чекори па оттука добро е да се сретнеме и да споделиме мислења, сите заедно, за чекорите што треба да се направат во иднина. Верувам дека ова е одлична можност за градење подобро регионално разбирање”, рече таа.
Могерини подвлече дека Балканот е клучен регион за ЕУ но и дека Балканот е европски регион па оттука треба да се зајакне нивната перспектива за влез во ЕУ:
“Западниот Балкан е клучен регион за ЕУ пред се поради безбедноста, превенција на радикализацијата, област во која имаме добра соработка, поради менаџирањето на бегалците и границите. Јас често велам дека не треба да зборуваме за перспективата на овие земји за влез во Европа бидејќи тие се во Европа. Треба да зборуваме за перспективата за нивни влез во ЕУ и токму тоа е тема на денешната вечера. Ги поканив премиерите и мандатарот од шест земји од Балканот за да ја споделиме актуелната состојба во регионот и патот напред, како ЕУ да ги зајакне можностите и перспективите за добрососедски односи во регионот, како да се зајакне соработката помеѓу нив и со ЕУ и како да се зајакне трансформативната сила на ЕУ со цел да се развие инклузивно општество и владеење и жива економија. Мојата заложба и заложбата на комесарот Хан но и на тројцата претседатели – Туск, Јункер и Тајани (претседателите на Совет на ЕУ, Европска комисија и Европски парламент) – за тесна соработка со сите шест земји.”